«Սա նոր տեսակի քրեական հետապնդում է, նոր հոդվածի կիրառում է ազատ խոսքը լռեցնելու համար». Ռուբեն Մելիքյան aravot.am

Երեւանի ընդհանուր իրավասության դատարանի «Կենտրոն» նստավայրում դատավոր Սաթենիկ Անդրեասյանի նախագահությամբ հանրային գործիչ Էդգար Ղազարյանի՝ «ՍԴ դատավորների գործ» անունն ստացած դատական նիստում ավարտվեց ապացույցների հետազոտման փուլը: Դեկտեմբերի 15-ին, ժամը 17:00-ին նշանակված հաջորդ դատական նիստում կլինեն եզրափակիչ ելույթները:

Այսօրվա նիստի ավարտից հետո Էդգար Ղազարյանի փաստաբան Ռուբեն Մելիքյանն Aravot.am-ին ասաց. «Արդեն իսկ հետազոտված ապացույցների հիման վրա մենք պետք է նախապատրաստենք եզրափակիչ ելույթները: Մի քանի նիստերի ընթացքում Էդգար Ղազարյանը բազմաթիվ միջնորդություններ էր նախապատրաստել ապացույցների զանգվածը լրացնելու համար, այդ թվում՝ վկաների հրավիրելու մասով, գրավոր փաստաթղթեր ներկայացնելու մասով: Դրանցից մեկը բավարարվեց: Մասնավորապես, Հրայր Թովմասյանի հատուկ կարծիքը Սահմանադրական դատարանի հայտնի որոշման կապակցությամբ: Մյուս բոլոր միջնորդությունները մերժվեցին: Գնահատել դրանք՝ խախտում են, թե ոչ, այս պահին ես ձեռնպահ կմնամ, որովհետեւ դա կախված է լինելու դատարանի եզրափակիչ ակտից՝ վերդիկտից եւ վերդիկտի հիմքում դրված հիմնավորումներից:

Վերջնական հետեւությունը դրա հետ կապված մենք կարող ենք կատարել միայն դատական ակտին ծանոթանալուց հետո: Մենք մեր կարծիքը չենք փոխել, մենք ի սկզբանե համոզված ենք եղել, որ սա նոր տեսակի քրեական հետապնդում է, նոր հոդվածի կիրառում է ազատ խոսքը լռեցնելու համար: Ցավոք սրտի, մեր մոտեցումները հետագայում հիմնավորվեցին: Մասնավորապես, սույն հոդվածով մենք ունեցանք նաեւ մեկ այլ մեղադրյալ:

Փաստաբան Կոչուբաեւը նույն հոդվածով է մեղադրվում: Մենք կարծում էինք, որ այս հոդվածի մեկնաբանությունը, մասնավորապես, արատավոր տեղեկությունների մեկնաբանությունը, որ տրվում է դատախազության կողմից, չի համապատասխանում դրա բուն էությանը եւ օգտագործվում է քաղաքական անհրաժեշտությունից ելնելով: Այստեղ ունենք ՍԴ դատավորների հետ կապված հոդված, քննիչ դատախազ, դատավոր: Բայց փաստաբանների հետ կապված, մենք դա արձանագրել ենք, եթե փաստաբանների հասցեին նույնպես վիրավորանք են արտահայտում, ապա այս հոդվածն ինչո՞ւ չի գործում: Այդպիսի դեպքեր եղել են, ես էլ դրանց մասին խոսել եմ: Կարծում եմ, որ եթե այդ հոդվածն այդպես է կիրառվում, ապա նույնը պետք է լինի:

Օրինակ, Էդգար Ղազարյանի վերջին միջնորդությունն էլ հենց այդ նույն ուղղությամբ էր: Հրապարակային մակարդակում՝ Նիկոլ Փաշինյան, Ալեն Սիմոնյան, Անդրանիկ Քոչարյան, Արուսյակ Ջուլհակյան, դեռ ժամանակին ՍԴ դատավորների՝ Հրայր Թովմասյանի եւ այլոց հասցեին, շատ ավելի կոշտ ձեւակերպումներ են իրենց թույլ տվել: Դրանք հանցագործություն չեն, իսկ Էդգար Ղազարյանի արածը հանցագործությո՞ւն է: Սա խտրական մոտեցման հերթական դրսեւորումն է»:

Աշոտ ՀԱԿՈԲՅԱՆ