ՀՀ իրավապահները հրաժարվել են Ռուսաստանին հանձնել Ռոբսոնին hraparak.am

2025 թվականի նոյեմբերի 7-ին ՀՀ ոստիկանության աշխատակիցները հայտնաբերել էին Ռուսաստանի Դաշնության իրավասու մարմինների կողմից հետախուզվող Ռ. Թաթուլյանին՝ Ռոբսոնին:

«Ռ. Թաթուլյանն արգելանքի չի վերցվել ՀՀ քաղաքացի հանդիսանալու, հետևաբար՝ օտարերկրյա պետությանը հանձնման ենթակա չլինելու հիմքով», «Հրապարակ»-ի հարցին ի պատասխան հայտնեցին Գլխավոր դատախազությունից։ Ռուսաստանում Թաթուլյանը (Ռոբսոն) հետախուզվում է սպանության, խարդախության և մի շարք այլ հանցագործություններ կատարելու մեղադրանքով։ Նրա նկատմամբ կալանք է կիրառվել` հեռակա կարգով։

Նշենք, որ Թաթուլյանը պարբերաբար հայտնվել է ռուսական եւ հայկական մամուլի ուշադրության կենտրոնում․ նա 2017 թվականին այն 10 «օրենքով գողերի» ցուցակում է եղել, որոնց նկատմամբ ԱՄՆ ֆինանսների նախարարության Օտարերկրյա ակտիվների վերահսկման գրասենյակը (OFAC) պատժամիջոցներ էր սահմանել ։ Թաթուլյանը 2017 թվականին նաեւ Հայաստանի վարչապետին աջակցություն հայտնած գործարարների թվում էր: Մի խումբ գործարարներ հայտարարել էին, որ աջակցելու են Կարեն Կարապետյանին՝ Հայաստանում «խորը բարեփոխումներ անցկացնելու գործում»։