ԵՐԵՎԱՆ, 13 նոյեմբերի – Sputnik. Վոլգոգրադում գործող «Պրոմգլաս» ընկերությունը նախատեսում է իր բժշկական արտադրանքը՝ փոքր երեխաների և հղի կանանց համար սառեցնող սպեղանիները, գրանցել Հայաստանում։ Այս մասին
Sputnik Արմենիային տված հարցազրույցում ասաց ընկերության տնօրեն Դմիտրի Կոստենկովը։ Նա Հայաստան է ժամանել Վոլգոգրադի մարզի յոթ ընկերությունների պատվիրակության կազմում։
Նրա խոսքով, այս սպեղանիները պարունակում են եթերային յուղեր, որոնք սառեցնող էֆեկտ են ապահովում: Դա օգնում է թեթևացնել բարձր ջերմության հետ կապված անհարմարությունը և շնչառությունը, ինչը անհրաժեշտ է այն երեխաներին և հղի կանանց, որոնք չեն կարող դեղորայք ընդունել:
«Մենք դրանցում կիրառում ենք բնական բաղադրիչներ և ունենք համապատասխան հավաստագիր», - հավելեց Կոստենկովը։
Նա ուսումնասիրել է տեղական դեղատները, բայց այնտեղ նմանատիպ ապրանքներ չի գտել, նաև չի կարողացել գտնել իր մեկ այլ արտադրանք՝ գազերը հանող խողովակներ նորածինների համար (օգտագործվում են սուր ցավի դեպքում, երբ որովայնի մերսումը արդյունավետ չէ): Ընկերությունն ունի նաև արտադրանք, որը Ռուսաստանի մասշտաբով նորույթ է՝ քթի լվացման համար ներարկիչի կցորդ: Այն հիմա փորձարկվում է Վոլգոգրադի մարզի հիվանդանոցներում՝ հետվիրահատական խնամքի համար:
Հաշվի առնելով առանձնահատկությունը՝ նշված բոլոր արտադրանքները պատրաստված են հիպոալերգիկ նյութերից, իսկ ներարկիչների կցորդները ունեն ոչ տրավմատիկ, այսինքն՝ վնասվածքներ չհասցնող կառուցվածք։
«Այս և մյուս արտադրանքներն անցել են կլինիկական փորձարկումներ և իրացվում են Ռուսաստանի դեղատնային ցանցերում: Մենք նաև այստեղ մատակարարման ծրագրեր ունենք»,- նշեց Կոստենկովը:
Մեկ այլ ընկերություն՝ «Քիմագրոթրեյդը», արդեն այցելել է Հայաստանի մի քանի խոշոր ֆերմերային տնտեսություններ, որտեղ ներկայացրել է հեղուկ պարարտանյութեր։
«Հայաստանում կան բազմաթիվ փոքր ֆերմերային տնտեսություններ, որոնք խորհրդատվական աջակցության կարիք ունեն։ Մենք կարող ենք ոչ միայն վաճառել պարարտանյութեր, այլև տրամադրել խորհրդատվություն, հատկապես, որ մեր ընկերությունն ունի 40,000 հեկտար, որտեղ աճեցնում ենք տարբեր մշակաբույսեր և փորձարկում մեր բոլոր արտադրանքը։ Մեր գործընկերների համար ստեղծում ենք բույսերի պաշտպանության և սնուցման տեխնոլոգիական քարտեզներ», - Sputnik Արմենիային ասաց ընկերության գլխավոր գյուղատնտես Ալեքսանդր Ռուդենկոն։
Վոլգոգրադում արտադրվող պարարտանյութերն արդեն վաճառվում են Կալմիկիայում, Սարատովի և Սամարայի մարզերում, ինչպես նաև Կրասնոդարի երկրամասում և Կաբարդինո-Բալկարիայում (որը, ներմուծման փոխարինման ծրագրերի շնորհիվ, պտղատու այգիների մակերեսով Կրասնոդարի երկրամասից հետո Ռուսաստանում երկրորդն է):
Վոլգոգրադի մարզի պատվիրակության այցը տեղի է ունեցել Ռուսաստանի արտահանման կենտրոնի և Հայաստանում Ռուսաստանի առևտրային ներկայացուցչության աջակցությամբ։
Նոր Լուր
Մուտք
Կարգավորումներ
sputnik
