Ռուսաստանը «վերադառնում է» Մերձավոր Արևելք. Հարավային Կովկասում «նոր դիմագի՞ծ» 1in.am

«Ռուսաստանի Անվտանգության խորհրդի քարտուղար Սերգեյ Շոյգուն անսպասելի այց է կատարել Կահիրե»,- գրում է թուրքական «Անադոլու» պետական գործակալությունը, որի տեղեկություններով նա հանդիպում է ունեցել Եգիպտոսի նախագահ Աբդելաֆաթահ աս-Սիսիի հետ: Կողմերը քննարկել են «հարաբերությունների զարգացման ուղիները՝ հաշվի առնելով ընթացիկ ազդակը և համագործակցության ներուժը»: Ձևակերպումը, ըստ «Անադոլուի», արել է Եգիպտոսի նախագահի գրասենյակը:

Հանդիպման ընթացքում աս-Սիսին կարևորել է Շարմ էլ Շեյխի պայմանավորվածությունների լիարժեք կատարման անհրաժեշտությունը՝ Գազայում «պատերազմի բոլոր փուլերն ավարտելու, հրադադարն ամրապնդելու և տարածաշրջան մարդասիրական անխափան օգնություն հասցնելու համար»: Եգիպտոսի նախագահի գրասենյակի հաղորդագրությունը հատկապես ընդգծում է, որ «տարածաշրջանում ամուր խաղաղություն և կայունություն հաստատելու միակ ճանապարհը միջազգային իրավունքին համապատասխան երկպետություն որոշման իրականացումը և Պաղեստինի անկախ պետության ստեղծումն է»:

«Պաղեստինի ազատագրման կազմակերպությունը» խորհրդային շրջանում վայելել է Մոսկվայի ոչ միայն քաղաքական, այլեւ ֆինանսական և ռազմական աջակցությունը, նրա առաջնորդ Յասիր Արաֆաթը շուրջ երկու տասնամյակ վայելել է Կրեմլի լիակատար բարեհաճությունը: ԱՄՆ նախագահի հովանավորած Շարմ էլ Շեյխի «Խաղաղության գագաթաժողովին» Ռուսաստանը չի հրավիրվել: Եգիպտոսի նախագահի գրասենյակի հաղորդագրության ենթատեքստից հասկացվում է, որ Ռուսաստանը Մերձավոր Արևելքի կարգավորումներին մասնակցության հող է շոշափում: Եգիպտոսը Շարմ էլ Շեյխի պայմանավորվածությունների երաշխավորններից մեկն է՝ Միացյալ Նահանգների, Թուրքիայի և Կատարի հետ միասին:

Ռուսաստանյան Sputnik-ը տեղեկացրել է, որ Սերգեյ Շոյգուն Կահիրեում բանակցություններ է վարել նաև Եգիպտոսի «արտաքին գործերի և պաշտպանության նախարարներ Բեդր Աբդուլաթիի և Աբդուլմաջիդ Սակրի, ինչպես նաև անվտանգության և հետախուզության մարմինների բարձրաստիճան ներկայացուցիչների հետ»: Այդ տեղեկությունը թույլ է տալիս ենթադրել, որ Ռուսաստանի Անվտանգության խորհրդի քարտուղարը Կահիրե է գործուղվել, որպեսզի քննարկի ռազմական, անվտանգային և հատուկ ծառայությունների մակարդակներով ռուս-եգիպտական համագործակցության հնարավորությունը:

Այս առումով ուշագրավ է, որ Շոյգուն և Եգիպտոսի նախագահը քննարկել են նաև ռուս-ուկրաինական հակամարտությունը եւ կարգավորման հեռանկարը, և աս-Սիսին աջակցություն է հայտնել պատերազմը դադարեցնելու և արդարացի խաղաղության հաստատման բոլոր ջանքերին: Ուկրաինայի դեմ պատերազմ սկսելուց ի վեր Մոսկվան, թերևս, առաջին անգամ է Կահիրեի հետ քննարկում այդ հարցը: Տարածաշրջանի երկրներից ռուս-ուկրաինական կարգավորմանը գործնական ներգրավվածություն ունեցել է Թուրքիան: Անկարան շարունակում է Ստամբուլում Մոսկվայի և Կիևի ներկայացուցիչների չորրորդ հանդիպում կազմակերպելու պատրաստակամություն դրսևորել:

Ըստ երևույթին, արժե նաև դիտարկել, որ Ռուսաստանի Անվտանգության խորհրդի քարտուղարը Կահիրե է գործուղվել Սիրիայի նախագահի ԱՄՆ այցի նախօրեին: Մոսկվան Դամասկոսի հետ լիովին չի կարգավորել իր երկու ռազմակայանների ապագայի հարցը, բայց արաբական աղբյուրներն Հմեյմիմ օդանավակայանում արձանագրել են ՌԴ ռազմատրանսպորտային միջոցների մի քանի վայրէջք: Ռուսաստանը պաշտոնապես ճանաչել է Պաղեստինի անկախությունը, ֆորմալ առումով պաշտպանում է Սիրիայի ինքնիշխանությունը եւ տարածքային ամբողջականությունը: Մերձավոր Արևելք Ռուսաստանի վերադարձը կարող է ռուս-ամերիկյան բանակցությունների մաս կազմել՝ ներառնելով նաև Հարավային Կովկասում «աշխարհաքաղաքական նոր դիմագիծ ձևավորելու» շուրջ քննարկումները: