Վահան Քերոբյանի ձերբակալման հետքերով․ դատարանի գործն ու նոր ձերբակալությունը armlur.am

Քիչ առաջ հայտնել էինք, որ Էկոնոմիկայի նախկին նախարար Վահան Քերոբյանը ձերբակալվել է։ Նշենք, որ նա ևս մեկ քրեական գործով է անցնում, և դեռ ավելին՝ 2024 թվականին գտնվել է կալանքի տակ։

Նրա դեմ 2024 թվականին հարուցված քրեական գործը դեռ քննվում է Հակակոռուպցիոն դատարանում։

Վահան Ռուբենի Քերոբյանին մեղադրանք է առաջադրվել այն բանի համար, որ նա՝ 2020 թվականի նոյեմբերի 26-ից զբաղեցնելով ՀՀ էկոնոմիկայի նախարարի պաշտոնը և պատասխանատու լինելով ՀՀ էկոնոմիկայի նախարարության խնդիրների ու գործառույթների, այդ թվում՝ մրցակցային պայմանների բարելավման, գործարար միջավայրի բարելավման և ձեռնարկատիրության խթանման, կայուն տնտեսական զարգացման ու տնտեսական մրցակցության բարձրացման, ներդրումային բարենպաստ միջավայրի ապահովման, հանրային ներդրումների արդյունավետության բարձրացման համար, և իրականացնելով ՀՀ օրենսդրությամբ իրեն վերապահված այլ գործառույթներ, իրավասու լինելով իր տեղակալներին տալ ցուցումներ և հանձնարարականներ, իր տեղակալների՝ իրեն հաշվետու լինելու պայմաններում, որպես պաշտոնատար անձ իրավասու լինելով կատարել միայն այնպիսի գործողություններ, որոնց համար լիազորված է ՀՀ Սահմանադրությամբ և օրենքներով, ՀՀ էկոնոմիկայի նախարարության՝ իրեն ենթակա պաշտոնատար անձանց հետ նախնական համաձայնությամբ՝ խմբի կազմում, իր իշխանական և ծառայողական լիազորությունները և դրանցով պայմանավորված ազդեցությունը ծառայեցրել է ի վնաս պետական և ծառայողական շահերի, կատարել է այնպիսի արարք, որը չի բխել իր լիազորություններից և դուրս է իր լիազորությունների շրջանակից, որի հետևանքով էական վնաս է պատճառվել կազմակերպության իրավունքներին և օրինական շահերին, ինչպես նաև պետության օրինական շահերին։

Աշոտ Պետրոսի Հովհաննիսյանին մեղադրանք է առաջադրվել այն բանի համար, որ նա, հանդիսանալով «Սիներջի Ինթերնեշնըլ Սիսթեմզ» բաժնետիրական ընկերության մասնաճյուղի տնօրենների խորհրդի նախագահ և ցանկանալով ապահովել նշված ընկերության անխոչընդոտ հաղթանակը ՀՀ էկոնոմիկայի նախարարության կարիքների համար 2022 թվականի հոկտեմբերին հայտարարված «Հանրային ներդրումային ծրագրերի բանկի ստեղծման ծառայությունների ձեռքբերման» գնման գործընթացում, ընկերության աշխատակիցների հետ դրդել և օժանդակել է պաշտոնատար անձանց՝ ՀՀ էկոնոմիկայի նախարար Վահան Քերոբյանին, նախարարի տեղակալ Անի Իսպիրյանին (ով հանդիսացել է նաև նշված ծառայության ձեռքբերման նպատակով ստեղծված գնահատող հանձնաժողովի նախագահը), նույն հանձնաժողովի անդամներ՝ նախարարության իրավաբանական վարչության խորհրդական Աշոտ Սողոմոնյանին, նախնական համաձայնությամբ՝ խմբի կազմում, անցնել իրենց ծառայողական լիազորությունները, ինչպես նաև իրենց լիազորությունները և դրանցով պայմանավորված ազդեցությունն օգտագործել ի վնաս պետական և ծառայողական շահերի՝ այն ծառայեցնելով իր օգտին ապօրինի գործողություններ կատարելուն, որի հետևանքով էական վնաս է պատճառվել «Հարմոնի» տեղեկատվական տեխնոլոգիաների և կրթության զարգացման հիմնադրամի իրավունքներին և օրինական շահերին, ինչպես նաև պետության օրինական շահերին։

Իսկ թե ինչ քրեական վարույթի շրջանակում են նրան ձերբակալել՝ դա կապված է նրա նախարար եղած տարիների գործունեության հետ։ Մանրամասները կներկայացվեն քիչ անց։

Քնար Մանուկյան