ԼՂ-ում կարգալույծ քահանայից էին մարդիկ օրհնություն ստանում. ոչ ոք չէր ասում՝ ինչու եք նրա մոտ գնում. Աթանեսյան armtimes.com

ԼՂ ԱԺ նախկին պատգամավոր, հրապարակախոս Վահրամ Աթանեսյանի խոսքով՝ Ադրբեջանում ՌԴ դեսպանի հայտարարությունն այն մասին, թե 7-րդ անգամ է այցելում ազատագրված Ղարաբաղ, չի զարմացնում, քանի որ խաղաղապահների ներկայությամբ է տեղի ունեցել էթնիկ զտումը:

Նրա խոսքով՝ պետք չէ այս հայտարարությունների վրա շատ կենտրոնանալ. «Պետք է իրավիճակը գնահատել սթափ և նոր հակասություններ ձեռք չբերել»:

ՌԴ ԱԳՆ պաշտոնական ներկայացուցիչ Մարիա Զախարովան զարմացած հարցրել է, թե ինչու են Վարդան Ղուկասյանին կարծիք հայտնելու համար կալանավորել: Աթանեսյանը նկատում է՝ Զախարովայի հայտարարությունը հիմնավորում է այն տեսակետը, որ Գյումրու ընտրությունները անցկացվել են արտաքին սցենարով և նպատակ են հետապնդել նույնը կրկնել 2026 թվականի ընտրություններին:

«Այս փորձը ՌԴ-ն կիրառել է Մոլդովայում, սակայն չի հաջողվել: ՌԴ-ն փորձում է իր ազդեցությունը հաստատել ամբողջ հետխորհրդային տարածքի վրա»,- ասում է նա:

Վահրամ Աթանեսյանը չի հասկանում, թե ինչու են իշխանության ընդդիմախոսները դժգոհում Հայաստանի դեպի Եվրոպա գնալու ցանկությունից. «Հայաստանը որքան ազատ, այնքան լավ. փակ երկրում գործում է այն, ինչ առաջ ՀՀԿ գործիչներից մեկը պարզ հայտարարել է, որ Հայաստանում դեպի իշխանություն ճանապարհը Մելիք Ադամյանը փողոցով է անցնում, այսինքն՝ «Հանրապետական» կուսակցության գրասենյակը պետք է օրհներ դեպի իշխանություն ցանկացած քաղաքական ուժի ճանապարհը, դրա համար եղավ 2018 թվականի հեղափոխությունը»:

Անդրադառնալով Հովհաննավանքի հոգևոր հովիվ Արամ քահանա Ասատրյանին կարգալույծ անելուն և նրա անցկացրած պատարագները Մայր Աթոռի կողմից սրբապղծություն որակելուն՝ զրուցակիցն ասում է. «Ստեփանակերտում տարիներ շարունակ կարգալույծ քահանա կար, մարդիկ գնում նրանից էին օրհնություն ստանում, խոստովանություն անում: Ոչ մեկը չէր ասում՝ ինչու են նրանից խորհուրդ հարցնում կամ օրհնություն ստանում»:

Ըստ Աթանեսյանի՝ Հայ առաքելական եկեղեցին պատերազմից հետո դարձել է քաղաքական ընդդիմություն: «Կաթողիկոսը այլ երկրների քաղաքական նարատիվը բերում է ՀՀ քաղաքական կյանք, այսինքն՝ կատարում է այլ երկրի քաղաքական պատվեր: Նա պետք է հեռանալու որոշում կայացնի հանուն հայ եկեղեցու հեղինակության»:

Առավել մանրամասն՝ «Հայկական ժամանակ»-ի հետ հարցազրույցում: