«Փրկչի» երկրորդ գալստյանն սպասելիս hraparak.am

ՀՀ վարչապետ Նիկոլ Փաշինյանը լսե՞լ է, արդյոք, հանրահայտ ճշմարտությունը, որ երկու անգամ նույն գետը մտնել հնարավոր չէ: Ինձ թվում է՝ չի լսել: Հակառակ դեպքում չէր փորձի երկրորդ անգամ գնալ Հովհաննավանք ու սուտ պատարագի մասնակցել: Առաջին անգամի էֆեկտն այլ էր, երկրորդ անգամը, չգիտեմ՝ որեւէ էֆեկտ կունենա՞, ինչ-որ բանով կտարբերվի՞ առաջինից… Ասենք՝ մասնակիցների դեմքով, քանակով, որակով, սուտ հավատացյալների մոլեռանդությամբ: Առողջապահության նախարարը, օրինակ, հնարավո՞ր է, երկրորդ պատարագին ներկայանա գզգզված մազերով եւ ավելի մոլեռանդ աղոթի… Կամ ինքը՝ Նիկոլը, հնարավո՞ր է այս անգամ ավելի ջերմ ողջագուրվի Հովհաննավանքի «կլյուչնիկ» Ստեփանի հետ, որը, իբրեւ «նիկոլօրհնյալ հովվապետ», վանքի դռները փակել է մյուս վանականների ու ժողովրդի առաջ: Մնում է արդեն եկեղեցու պատին գրեն՝ կողմնակի անձանց մուտքն արգելվում է…

Իսկ հիմա՝ եկեղեցու դռները հավատացյալների առաջ փակելու մասին: Ժամանակին Նիկոլը հայտարարում էր, որ իր գալով նախարարությունների ու պաշտոնյաների դռները միշտ բաց են լինելու քաղաքացիների համար: Ժողովուրդն էլ էշի պես հավատում էր, որ էսա-էսա՝ ինքը քացով է բացելու նախարարների դռներն ու ներս մտնի, նախարարներին ստիպի աշխատել… Առը հա քո բախտից, հայ ժողովուրդ, որ քո երկրի տերն ես, իբր: Քանի՞ նախարարի դուռ ես կոտրել մինչեւ հիմա, իշխանության եկածներից քանիսի՞ երեսն ես տեսել, ո՞վ է մատիցդ մի փուշ հանել: Լափել-հաստացել են քո հաշվին, քեզ էլ ձեռ են առնում, թքում ամեն ինչիդ, այդ թվում՝ եւ հավատիդ վրա: Էդ հիմա եք չքմեղանում՝ բա մենք ի՞նչ իմանայինք, մեզ խաբեցին… Քանի՞ անգամ խաբեց ձեզ… 20 թվին չզգացի՞ք, որ խաբել է ձեզ, 21 թվին խաբված չէի՞ք դեռ… Ինչքա՞ն պիտի դեռ խաբի, խնդա վրաներդ, ձեռ առնի, որ ի վերջո հասկանաք՝ ոչ թե ղեկավար, այլ փորձանք է եկել ձեր գլխին: Այսօր էլ նրա «սրտիկ-մրտիկներից» փլվողներ կան, բա ամոթ չի՞: Ինչեւէ, ոչ թե դուք, այլ ինքն է այս երկրի տերը: Նախարարությունների դռներն էլ կփակի, Ազգային ժողովի դռներն էլ… Դուք ո՞վ եք, որ մուտք ունենաք պետական հաստատություններ:

Պետությունն իրենն է, կառավարությունն ինքն է, ԱԺ-ն ինքն է, ձեր տերն ինքն է… Մի եկեղեցի ունեիք, որի դռները միշտ բաց էին ձեր առաջ, ու հիմա դա էլ են փակում: Հովհաննավանքի դռներն այսօր փակ են Հայ Առաքելական Սուրբ Եկեղեցու հետեւորդների եւ թափառող կենդանիների համար: Պիտի ՔՊ-ի կամ միլիցու վկայական ունենաք, որ ներս թողնեն: Ասում են՝ Նիկոլի աշխատակազմի կողմից տրված «ուդոն» էլ է անցնում… Ունե՞ք՝ լավ, չունե՞ք՝ կարող եք մինչեւ գալիք կիրակի ձեռք բերել ՀՀ նախագահի պալատում ապրող քնած մանուշակից՝ էն, որ անունով հեթանոս է, իսկ ազգանունով՝ յաման քրիստոնյա:

Որպեսզի Նիկոլի 2-րդ գալուստը Հովհաննավանք մի քիչ ավելի հանդիսավոր ստացվի, առաջարկում եմ նրա ընթացքի պահին ծնծղաներ զարկել՝ ցըըըը-մփ, նրա գլխին հովանի պահել, վառել միայն անուշաբույր մոմեր՝ made by Stefanos մակագրությամբ: Հա, բա ջիպը… Նիկոլի հետույքը տանող մեքենան պետք է ձեւափոխել եւ վերածել շուշաբանդով «պապոմոբիլի» (papamobile), կամ էլ էշի վրա նստած բերեք, որ ճառագի իր ողջ «առաքինությամբ»: