Ալիևը մերժո՞ւմ է Երևանի հրավերը 168.am

ՀՀ իշխանությունները պատրաստվում են Երևանում 2026 թվականի մայիսին ընդունել Եվրոպական քաղաքական համայնքի հերթական գագաթնաժողովը։

Մակրոնի նախաձեռնությամբ հիմնված այս հարթակը, որի որևէ գագաթնաժողով Նիկոլ Փաշինյանը կարծես բաց չի թողել, և որոնք վճռորոշ են եղել նաև հայ-ադրբեջանական շփումների տեսանկյունից, հիմնականում քննարկում է հակառուսական թեմատիկա՝ ինչպես համագործակցել, ինչպես աջակցել Ուկրաինային, որպեսզի Ռուսաստանը պատերազմում չհաղթի կամ մատնվի պարտության։ Եվ այս հարթակի առաջիկա գագաթնաժողովներից մեկը լինելու է Երևանում՝ 2026-ի մայիսին։

ՀՀ ԱԳ նախարար Արարատ Միրզոյանն օրերս հայտնեց, որ Ադրբեջանի և Թուրքիայի նախագահներին բարձր մակարդակով բանավոր հրավիրել են Երևան՝ հաջորդ գարնանը կայանալիք Եվրոպական քաղաքական համայնքի 8-րդ գագաթնաժողովին։

«Հրավերներն առայժմ բանավոր են, դեռևս դետալները քննարկելու առիթ չի եղել: Ինչո՞ւ եք դժվար պատկերացնում նախագահ Էրդողանի այցը Երևան, երբ արդեն եղել է վարչապետ Փաշինյանի այցը Անկարա: Ես չեմ ասում՝ ամեն ինչ շատ հարթ է, նույն կերպ դժվար է պատկերացնել վարչապետ Փաշինյանի այցը Բաքու, ո՞նց կարելի է սա ժխտել, բայց ժամանակ է ընթանալու, և մենք գնում ենք էն ճանապարհով, որ մի օր այդ իրավիճակը լինելու է»,- ասել է Միրզոյանը։

Այս հայտարարությունից կարճ ժամանակ անց ադրբեջանական իշխանամետ լրատվամիջոցները, հղում անելով դիվանագիտական աղբյուրներին, արդեն գրում են, որ Ալիևը չի ընդունելու հրավերը և չի այցելելու Երևան։

«Ադրբեջանը հավատարիմ է իրական գործողությունների սկզբունքին: Առանց ստորագրված համաձայնագրի և գործնական մեխանիզմների գործարկման բարձր մակարդակի այցը կարող է կեղծ տպավորություն ստեղծել գործընթացի ավարտի մասին: Մինչև իրավական շրջանակի ստեղծումը և պարտավորությունների իրականացումը, նման քայլերը վաղաժամ կլինեն։

Ապագայում բարձր մակարդակի այցելությունների հնարավորությունը չի բացառվում: Ընդհակառակը, խաղաղության պայմանագրի ստորագրումից և իրականացումից հետո սա կլինի գործընթացի տրամաբանական շարունակությունը: Այժմ անհրաժեշտ են գործնական քայլեր՝ նախկինում համաձայնեցված պարտավորությունները կատարելու համար, որոնք կամրապնդեն խաղաղությունը ոչ միայն դե ֆակտո, այլև դե յուրե»,- գրում է ադրբեջանական Caliber.az-ը։

Ալիևը, որն այս հարթակի շրջանակում եվրոպական տարբեր մայրաքաղաքներում հանդիպում է Փաշինյանին, սուրճ խմում վերջինիս հետ, պայմանավորվածություններ ձեռք բերում, փաստորեն մտադրություն չունի այցելել Երևան միջազգային գագաթնաժողովի՝ առանց ստորագրված փաստաթղթի Երևանի հետ, չնայած հանգամանքին, որ ադրբեջանական կողմը ևս հայտարարում է, թե խաղաղություն է հաստատվել Վաշինգտոնում օգոստոսի 8-ից հետո։ Պաշտոնական Բաքվի դիվանագիտական «սառնությունն» ակնհայտորեն նպատակաուղղված է վերահսկելու գործընթացի տեմպն ու օրակարգը։ Ալիևը չի ցանկանում ներկայանալ հարթակ, որտեղ Հայաստանը լինելու է հյուրընկալող կողմ, ունենալու է ավելի բարենպաստ դիրքեր, քանի դեռ Բաքուն չի ստանում գրավոր երաշխիքներ։

Սա ընդհանուր առմամբ տեղավորվում է Երևանի որևէ առաջարկ չընդունելու, գործընթացի նկատմամբ ողջ վերահսկողությունը պահպանելու Բաքվի տրամաբանության շրջանակում։