Վարչապետ Փաշինյանին պետք է զրկել պետական աշխատավարձից, քանի որ վերջինս չի ընտրվել ՀՀ բոլոր քաղաքացիների կողմից  hraparak.am

Մի ժամանակ ՀՀ վարչապետի պաշտոնը զբաղեցնող անձի ամեն երկրորդ ելույթը նվիրված էր խորհրդային «գլավլիտին»՝ գրաքննություն իրականացնող պետական կառույցին: Փաշինյանը փորձում էր մարդկանց համոզել, որ նախորդ դարի առնվազն 60-70-ականներին՝ էլ չասած ավելի վաղ, ծնված սերունդը դաստիարակվել «գլավլիտի» պայմաններում: Ու դա էլ ձևավորում էր հայրենասիրության խորհրդա-հայկական մոդելը: Իհարկե, այդ թեզն ամբողջովին կեղծ է՝ ճիշտ այնպես, ինչպես 2018-ից այս կողմ նիկոլական համարյա ողջ խոսույթը: Կեղծ է, որովհետև խորհրդային հայրենասիրության դրվածքը սկիզբ առավ Հայրենական մեծ պատերազմով: Ու պատերազմի պատճառով էլ ստացավ որոշակի ազատություն, քանի որ Սովետական Միության առաջնորդ և «ժողովուրդների հայր» Իոսիֆ Ստալինը գիտակցեց, որ պատերազմում մարդկային գործոնը ենթադրում է համատարած անձնազոհություն: Իսկ այն չէր կարող կյանքի կոչվել զուտ «հանուն Ստալինի» կարգախոսով: Ու այն լրացվեց «հանուն հայրենիքի» բաղադրիչով, և այդ երկու բաղադրիչների ամբողջությունն ապահովեց մարդկային գործոնի արդյունավետությունը: Եվ քանի որ «ջինը»՝ տվյալ դեպքում դրական, բաց էր թողնվել շշից, այն այլևս վերահսկողության տակ չառնվեց: Կամ փորձեցին վերահսկել, բայց չկարողացան, ինչը նույն բանն է:

Ընդ որում, դա կատարել Ազգային ժողովի ՔՊ-ականների ձեռքով՝ չէ՞ որ Հայաստանը խորհրդարանական կառավարման (՞՞՞) երկիր է: Եվ խորհրդարանն (՞՞՞) է որոշում ինչ և ինչպես կատարել հարցերի հասցեագրման ուղղություններն ու եղանակները (վերջին երկու նախադասությունը գրելիս չկարողացա զսպել ծիծաղս): Ինչևէ, անցնեմ խնդրի բովանդակությանը: ՔՊ-ական Ղազարյան Թագուհին ու Գաբրիելյան Սիսակն առաջարկում են դադարեցնել «Շողակաթ» ալիքի հեռարձակումը: Բայց քանի որ 2018-ից այս կողմ մեզանում ամեն ինչ հիմնված է կեղծիքի վրա՝ որքան էլ այն թաքնված լինի ճշտի քողի տակ, ջահելները ձիու քայլ են կատարել: Նրանք ոչ թե «Շողակաթը» փակելու հարց են մտցրել Ազգային ժողով՝ համապատասխան օրինագծով, այլ Հայաստանում գործող երեք հասարակական հեռուստաընկերություններից մեկը փակելու հարցը: Ինչից կարելի է ենթադրել, որ երեք ալիք ունենալու ծանրաբեռնվածությանը երկրի պետբյուջեն չի կարողանում կրել՝ խե՜ղճ բյուջե: Երեքից մեկը Հանրային հեռուստաընկերությունն է, երկրորդը՝ «First Channel News» կոչվածը և երրորդը՝ «Շողակաթը»:

Պարզ է , որ Հանրայինը չի փակվելու: Ու եթե հիշենք, որ «First Channel News» կոչվածը հենց «ժողբաստիոնի» օրոք է հիմնադրվել, դա ևս չպետք է խնդիր լինի ջահելների համար: Ուրեմն մնում է «Շողակաթը»՝ այն ալիքը, որ, նախ, գործում է Հայ առաքելական եկեղեցու հովանու ներքո: Եվ երկրորդ, հեռարձակում է կրոնական և հոգևոր բովանդակություն՝ ներկայացնելով պատմական, մշակութային, գեղարվեստական ծրագրեր ու վավերագրական ֆիլմեր: Այսինքն, փորձում է հարստացնել մարդկանց ներաշխարհը, նրանց ներշնչել, որ ոչ միայն հացով է ապրում մարդը: Բայց հաշվի առնելով, որ երկրի վարչապետն աշակերտներին հորդորում է լավ սովորել, որպեսզի նրանք լավ ապրեն, ապա նման պարագայում «Շողակաթը» չպետք է տեղ ունենար «իրական Հայաստանում»: Որովհետև ո՞վ է տեսել, որ ազգային արմատներից ու արժանապատվությունից զուրկ մանկուրտը հոգևորի ու հավերժականի կարիք ունենա: Իհարկե, ոչ մեկը:

Այս պատմության մեջ ինձ «դուր եկավ» օրինագծի համահեղինակներից Ղազարյան Թագուհու մտածողությունը: Վերջինս Սիսակի նման չթաքցնելով, որ օրինագծի թիրախը «Շողակաթն» է, հիմնավորել է նաև այն փակելու պահանջը: «Շողակաթն», ըստ տիկնոջ, պետք է զրկվի պետական ֆինանսավորումից, քանի որ այն «չի ներկայացնում բոլոր քաղաքացիներին»: Հետևելով այդ տրամաբանությանը՝ իրեն առաջարկում եմ ԱԺ օրինագիծ ներկայացնել Փաշինյան Նիկոլին պետական աշխատավարձից զրկելու մասին, քանի որ վերջինս, որպես ՀՀ վարչապետ, չի ընտրվել բոլոր քաղաքացիների կողմից: Եվ ի գիտություն տիկնոջ՝ ավելացնեմ, որ Հայաստանի բնակչության ահռելի մեծամասնությունը քրիստոնյա է, իսկ քրիստոնյաների ահռելի մեծամասնությունը՝ Հայ առաքելական եկեղեցու հետևորդ: Այնպես որ եթե տիկինն առաջնորդվում է նման սկզբունքով, ապա պետք է չկանգնի կես ճանապարհին: Նա պետք է օրինագիծ ներկայացնի, որով ՔՊ-ական պատգամավորները ևս կզրկվեն աշխատավարձերից, քանի դրանք ևս չեն ներկայացնում Հայաստանի բոլոր քաղաքացիներին: Եվ այդ թվում նաև ինքը: