Անտառներից միլիոններ են ստանում, բայց մի կայք չեն կարողանում գործարկել hraparak.am

«Հայանտառը» պետական ոչ առևտրային կազղմակերպություն է, սակայն ամեն տարի տասնյակ հազարավոր խորանարդ մետր վառելափայտ ու շինափայտ է վաճառում։ Այն իր տնօրինած անտառներից նաև այլ եկամուտներ է ստանում։ «Հայանտառ» ՊՈԱԿ-ից տեղեկացել եմ, որ Տավուշի մարզի Արծվաբերդի, Նոյեմբերյանի, Սևքարի, Իջևանի «Անտառտնտեսություն» մասնաճյուղերում ՊՈԱԿ-ը 2024 թվականին ֆիզիկական և իրավաբանական անձանց հետ ունեցել է անտառային հողերի վարձակալության, արոտավայրից, խոտհարքից օգտվելու և անտառային հողերում մեղվափեթակներ տեղադրելու վերաբերյալ 92 պայմանագիր, որի շրջանակում ՊՈԱԿ-ի դրամական մուտքերը 2024-ին կազմել են 9 միլիոն 511 հազար 82 դրամ։

2025թ․-ին անտառային հողերի վարձակալության, արոտավայրից, խոտհարքից օգտվելու և անտառային հողերում մեղվափեթակներ տեղադրելու վերաբերյալ պայմանագրերը 68-ն են, որոնց շրջանակում 2025-ին նախատեսված դրամական մուտքերը կազմել են 12 միլիոն 659 հազար 47 դրամ։ Պետբյուջեից ֆինանսավորվող, նաև իր տնօրինած անտառներից դրամական մեծ մուտքեր ունեցող ՊՈԱԿ-ը չի կարողանում «Հայանտառի» պաշտոնական ինտներնետային կայքը գործարկել, երկար ժամանակ այդ կայքի գլխավոր էջի վերևում գրված է․ «Կայքը չի սպասարկվում տեխնիկական վերազինման պատճառով»։