«Փաշինյանն սկսել է նախկին նախագահներին արտահանձնելու գործընթաց». Մենուա Սողոմոնյան 168.am

«ՀայաՔվե» ազգային քաղաքացիական միավորման անդամ Մենուա Սողոմոնյանն այն կարծիքին է, որ իրավապահ համակարգն իր գործառույթները պատշաճ չի կատարում, իսկ Փարաքար համայնքի ընդդիմադիր ղեկավար Վալոդյա Գրիգորյանի և նրա ընկերոջ՝ ոստիկան Կարեն Աբրահամյանի սպանությունը նա համարում է ժողովրդավարությունը և հատկապես ՏԻՄ կառավարումը գերեզմանելու փորձ:

«Իմ դիտարկումը հիմնված է նրա վրա, որ բազմաթիվ են դեպքերը, երբ ժողովրդի կողմից ընտրված թեկնածուն, ի վերջո, չի կառավարում»,- 168TV-ի «Ռեվյու» հաղորդման ընթացքում ասաց նա:

Մենուա Սողոմոնյանի խոսքով՝ Նիկոլ Փաշինյանի առաջարկած «Չորրորդ Հանրապետությունը» և «Իրական Հայաստանը» ամենահակաժողովրդավար կոնցեպտներն են. «Ամենահակաժողովրդավար կառավարման փորձը հենց Փաշինյանինն է: Հայաստանը նմանվում է Ադրբեջանին, միայն մի տարբերությամբ, որ այնտեղի քաղաքացիներն ամեն օր զարթնում են հաղթողի կարգավիճակում, մենք՝ նսեմացված, արժանապատվություններս ստորացված վիճակում: Երկու պարագայում էլ ականատես ենք լինում բռնապետության: Փաշինյանի Չորրորդ Հանրապետությունում չի՛ գործելու օրենք, ոչ ոք չի կարողանալու բողոքել: Չորրորդ Հանրապետությունում մարդկանց ոչնչացնելու են ազատ խոսքի, համոզմունքի, միտք արտահայտելու համար»:

Նրա դիտարկմամբ՝ Նիկոլ Փաշինյանը սկսել է ՀՀ նախկին նախագահներին Ադրբեջանին արտահանձնելու գործընթաց.

«Խաղաղության նախաստորագրված պայմանագրի 8-րդ հոդվածով կողմերը (բնականաբար, այդ «կողմեր» ասելով՝ նկատի ունեն միայն Հայաստանը, որովհետև ինչը զիջում է՝ միայն Հայաստանի վզին է փաթաթված) պարտավորվում են պայքարել անջատողականության դեմ: Ադրբեջանին ամենաշատը դա է հետաքրքրում: Հիմա, երբ Նիկոլ Փաշինյանը նախկին նախագահներին մեղադրում է Արցախին աջակցելու մեջ, մեղադրում է անջատողականության մեջ, որովհետև իր հայրենասիրության մոդելում այլևս Արցախ գոյություն չունի, այն Ադրբեջանի տարածք է, և քանի որ Ադրբեջանից էլ հնչել է արտահանձնման մասին պահանջը, իսկ երեկ սոցցանցերում տարածված որոշ նիկոլականների մեկնաբանությունների տեսքով պահանջներ տեսանք՝ նախկին նախագահներին արտահանձնելու մասին, և քանի որ մեր պետության մեջ այլևս ոչինչ զարմանք չի առաջացնում, ես կարծում եմ, որ դրան էլ ենք հասնելու: Մենք այնքան ողբերգական վիճակում ենք, որ այս հանձնվողականության շղթայի մեկ օղակի վրա սևեռվում ենք և սկսում ենք դա քննարկել: Մի օր էլ գալու է, որ սկսելու ենք քննարկել՝ նախկին նախագահներին պե՞տք է արտահանձնել, թե՞ ոչ, կամ՝ եթե չարտահանձնենք՝ պատերազմ կլինի»:

Մանրամասները՝ 168TV-ի տեսանյութում