«ԱԱԾ տնօրենի վերադարձի մասին ԱԱԾ-ն կխոսի, եթե անհրաժեշտություն լինի»․ Արմեն Գրիգորյանը խուսափեց գերիների վերադարձի հարցից aravot.am

Ազգային անվտանգության խորհրդի քարտուղար Արմեն Գրիգորյանն այսօր հստակ պատասխան չտվեց լրագրողներին հարցին՝ ՀՀ ԱԱԾ տնօրենի՝ Բաքու կատարած այցի ժամանակ հայ գերիների վերադարձի հարցը քննարկվե՞լ է, որեւէ պայմանավորվածություն ձեռք բերվե՞լ է այս հարցում։

Հարցին, թե հնարավո՞ր է, որ նաեւ առաջիկայում ինքը այցելի Բաքու, Արմեն Գրիգորյանը պատասխանեց․ «Այդպիսի որեւէ քննարկում չկա»։

Հիշեցնենք, որ ՀՀ ազգային անվտանգության ծառայության տնօրենի գլխավորած պատվիրակությունը սեպտեմբերի 19-ից 21-ը մասնակցել է Բաքվում կայանալիք «Անվտանգության 3-րդ միջազգային ֆորումին»:

Այսօր Երեւանում անցկացվում է ՆԱՏՕ-ի խորհրդարանական վեհաժողովի 108-րդ Ռոուզ-Ռոթ սեմինարը։ Իր ելույթում ԱԽ քարտուղար Արմեն Գրիգորյանն ասաց․ «Խորհրդանշական է, որ Ռոուզ-Ռոթ սեմինարը տեղի է ունենում օգոստոսի 8-ին Վաշինգտոնում տեղի ունեցած գագաթնաժողովից հետո, որի արդյունքում Հարավային Կովկասում խաղաղություն է հաստատվել։ Խաղաղություն, որին տարածաշրջանի ժողովուրդները երկար են սպասվել»։

Նա հավելեց․ «Այժմ մենք աշխատելու ենք խաղաղությունը ինստիտուցիոնալացնելու ուղղությամբ, որպեսզի երաշխավորենք դրա հարատեւությունը։ Խաղաղության ինստիտուցիոնալացման համար մեծ կարեւորություն ունի տարածաշրջանի տնտեսական ենթակառուցվածքների ապաշրջափակումը։ Այս նպատակով Հայաստանը ժամանակին ներկայացրել է «խաղաղության խաչմերուկ» նախագիծը, որը դրական արձագանքի է արժանացել Հայաստանի գործընկերների կողմից։ Միաժամանակ Վաշինգտոնում ստորագրված եռակողմ հայտարարության հիման վրա ստեղծելու ենք «Թրամփի ուղի՝ հանուն միջազգային խաղաղության եւ բարգավաճման» հաղորդակցության ծրագիրը, որը խաղաղություն եւ բարգավաճում կբերի տարածաշրջան»։

Ռոզա ՀՈՎՀԱՆՆԻՍՅԱՆ