«Լավ չի անում»․ Արարատ Միրզոյանը՝ Իլհամ Ալիեւին aravot.am

«Երեւի գրավոր հարցում ուղարկեք Թուրքիայի ԱԳՆ»,- այսպես արձագանքեց ՀՀ ԱԳ նախարար Արարատ Միրզոյանը լրագրողի հարցին՝ ՔՊ-ի համագումարից առաջ։

Լրագրողը հիշեցրել էր Թուրքիայի ԱԳ նախարարի ակնկալիքների մասին, որ հաջորդ տարեսկզբին ՀՀ-ի եւ Ադրբեջանի միջեւ ստորագրվի խաղաղության նախաստորագրված համաձայնագիրը։ Արարատ Միրզոյանը հավելեց, որ դեռ մարտի կեսերին տեքստը համաձայնեցված էր, եւ հայկական կողմը հայտարարեց, որ պատրաստ է ստորագրել, այնպես էլ այժմ՝ նախաստորագրումից հետո, ժամկետներ չի սահմանում, ասում են՝ պատրաստ են օր առաջ ստորագրել։

Լրագրողները հետաքրքրվել էին «Թրամփի ուղու» մանրամասներից։ Արարատ Միրզոյանը կրկնեց՝ ՀՀ-ի եւ ԱՄՆ պատվիրակությունների միջեւ շփումների, բանակցությունների միջոցով են դետալները հստակեցնելու։ Ասաց, որ ադրբեջանական կողմի հետ էլ ունեն ընդհանուր պատկերացումներ եւ դրանք ամրագրված են վաշինգտոնյան փաստաթղթում։

Ադրբեջանին՝ Հայաստանի կողմից տրամադրվող «անխոչընդոտ» ճանապարհի, դրա փոխադարձության վերաբերյալ հարցերն Արարատ Միրզոյանին բարկացրեցին։

«20 հազար անգամ նույն հարցին պատասխանել ենք»,- ասաց եւ ընդդիմադիրների դիտարկումներից մեջբերումներին էլ հակադարձեց՝ «ընդդիմադիրներին մի լսեք»։

Լրագրողներից մեկը հարցրեց՝ Ադրբեջանի նախագահն ինչո՞ւ է «միջանցք» բառն ասում։

«Լավ չի անում»,- ասաց նա՝ հավելելով, որ իրենք պայմանավորվել են նրա շուրջ, ինչ-որ գրված է նախաստորագրված փաստաթղթերում, որի տակ ՀՀ եւ Ադրբեջանի նախագահների ստորագրությունն է, մի փաստաթուղթ էլ կա՝ նաեւ ԱՄՆ նախագահի ստորագրությունը կա։

Մանրամասները՝ տեսանյութում

Ամբողջական տեսանյութը՝ այստեղ

Նելլի ԳՐԻԳՈՐՅԱՆ