Պարոն նախագահ, Դուք ուրիշ հերոսի անուն չգիտե՞ք hraparak.am

Այլևս որևէ տարակույս չունեմ, որ այս «իմփիչմենտի» գաղափարը ծնվել է ՀՀԿ-ի վեհաշուք գրասենյակում: Ավելին ասեմ՝ Նարեկ Մալյանի լայվը կիսատ-պռատ լսելուց հետո համոզվեցի, որ դա Սերժ Սարգսյանն է հրահրում: Պարոն նախագահ, չէր կարելի վարչապետ Նիկոլին իմփիչմենտի ենթարկելու այս պատասխանատու գործը վստահել Նարեկ Մալյանին, որ փողոցից գալու իմաստով չի տարբերվում Նիկոլից` պատահական անցորդ, որին ոչ ինստրուկտաժ եք արել, ոչ բան, վերցրել ու վստահել եք: Ձեր խոսքով ասած՝ գնացել, նախրի մեջ հենց Նարեկ Մալյանի ճակատն եք պաչել: Դիտե՞լ եք կամ լսե՞լ եք Նարեկ Մալյանի վերջին լայվը: Եթե էկրանիս Նարեկի դեմքը չլիներ, կմտածեի՝ Նիկոլն է ելույթ ունենում ԱԺ-ում և, հիստերիայի մեջ ընկած դիմում է «Հայաստան» խմբակցությանը: Շանտաժ, սպառնալիքներ, վիրավորանքներ «Հայաստան» դաշինքի առաջնորդի և պատգամավորների հասցեին:

Պարոն նախագահ, ինչի՞ այսպիսի բաներ հրահրում: Ո՞վ է տեսել՝ մարդը մտնի հարևանի տուն, քֆուր-քյաֆար տա սրա ազգուտակին, վերջում էլ խնդրի՝ կարողա՞ «բալգարկեդ» մի ժամով տաս, մի քիչ գործ ունեմ… Այ քեզ բա՜ա՜ա՜ն: Հասկացանք՝ իմփիչմենտ եք ուզում, հասկացանք, որ առանց «Հայաստան» դաշինքի չեք կարող անել, հասկացանք, որ առանց ՔՊ-շնիկների էլ դա գլուխ չի գալու, հասկացանք… Բայց կարելի է չէ՞, ինչ-որ պահի կանգ առնել ու գնահատել իրավիճակը: Լավ չի, էլի, պարոն նախագահ, համ իրավիճակին չեք տիրապետում, համ էլ Նարեկ Մալյանի միջոցով շանտաժ-սպառնալիքներ եք տարածում աջուձախ: Մի հատ Ձեր նախագահական բարձունքից ինձ ասեք, խնդրում եմ, Նարեկ Մալյանն ո՞վ է, որ ՀՀ 2-րդ նախագահին սպառնա: Վիրավորանքների, «Հայաստան» դաշինքի պատգամավորներին ուղղված հաշվեհարդարի խոստումների մասին դեռ չեմ խոսում: Ուզում էիք այս անպտուղ իմփիչմենտը տապալե՞լ՝ լռեիք, մոռացության տայիք… Այլապես այն դարձրել եք նախընտրական ծրագիր ու բերել խորհրդարան, թե սա է Հայաստանի փրկությունը:

Կյանքում առաջին անգամ չեմ հավատում Ձեզ, պարոն նախագահ: Ավելին ասեմ՝ սկսել եմ աստիճանաբար չհավատալ նաև Ձեր նախորդ ասածներին… Չթվարկեմ: Ի՞նչ անել: Պետք է վերցնել իմփիչմենտի այս ողջ մարտիրոսությունն ու տալ Նիկոլի գլխին: «Հայաստան» դաշինքն, ինձ թվում է, այդպես էլ կանի: Գնալ Նարեկ Մալյանի հետևից, տեղի տալ նրա սպառնալիքներին, նշանակում է Նիկոլին ևս 5 տարի թողնել վարչապետի աթոռին: Ուզում եք լսումնե՞ր… Կստանաք այն, բայց պատրաստ եղեք լսելու նաև ճշմարտությունն այս ամբողջ տրագիկոմեդիայի մասին, որ կոչվում է Հայաստանի կործանում: