Բացի ջուր խմելուց Ղալամքարյանն ի՞նչ կապ ունի ջրային ոլորտի հետ hraparak.am

Նախօրեին լուրեր տարածվեցին, որ Արամազդ Ղալամքարյանը կնշանակվի Ջրային կոմիտեի նախագահ։ Արամազդ Ղալամքարյանը մասնագիտությամբ տնտեսագետ է, ՀԱԿ վարչության նախկին անդամ։ Նա ՀԱԿ-ից դուրս գալու դիմում էր գրել այս տարվա ապրիլին, որին հաջորդել էր Լևոն Տեր-Պետրոսյանի մասին սկանդալային գրառումը։ Նա աշխատել է նաև «World Vision Armenia»-ում, «Քաղաքացիական պայմանագիր» խմբակցության պատգամավոր Խաչատուր Սուքիասյանին պատկանող «Հայէկոնոմբանկում», աշխատել է նաեւ Նիկոլ Փաշինյանի «Հայկական ժամանակ» օրաթերթում։ Նրա կինը Աննա Հակոբյանի հետ է սովորել: Հիշեցնենք, որ Ջրային կոմիտեի նախկին նախագահ Կարեն Սեդրակյանը` Գագիկ Ջհանգիրյանի փեսան, պաշտոնից ազատվեց սեպտեմբերի 11-ին` ընդամենը 4 ամիս այդ պաշտոնում աշխատելուց հետո` նշանակվել էր 2025-ի մայիսին։ Իսկ Սեդրակյանից առաջ Ջրային կոմիտեի նախագահը Աբովյանի նախկին քաղաքապետ Վահագն Գևորգյանն էր, որը մեղադրվում է կոռուպցիոն հանցանքների մեջ և դեկտեմբերին երկու ամսով տնային կալանքի էր ենթարկվել:

Արամազդ Ղալամքարյանից «Հրապարակը» հետաքրքրվեց` ի՞նչ կապ ունի ինքը ջրային ոլորտի հետ, երբևէ աշխատե՞լ է Ջրային կոմիտեում, գիտի՞ ինչ հիմնախնդիրներ կան եւ այլն: Ի վերջո միայն ջուր խմելն ու լոգանք ընդունելը բավական չեն Ջրային կոմիտեի նախագահ դառնալու համար: Ղալամքարյանը խուսափեց մեր հարցին հստակ պատասխանել, բացառապես նշելով. «Ժամանակը կգա, բոլոր հարցերին կանդրադառնամ։ Շնորհակալ եմ»:

Հ.Գ Արտավազդ Ղալամքարյանը հատկապես վերջին շրջանում իր ֆեյսբուքյան էջում իշխանահաճո գրառումներ էր անում, արդարացնում Նիկոլ Փաշինյանին, գովաբանում նրան: Փաստորեն, Հայաստանում պաշտոն ստանալու միակ միջոցը դարձել է Փաշինյանին քծնելը, որը ցանկալի է կատարել սոցցանցերում: Մի քանի ամսվա նման աշխատանքը, ըստ էության, արագ «արդյունքի» է հանգեցնում:

Հայկ Գևորգյան