Ռուբեն Հայրապետյանի նկարն են տարածում. այն ժամանակ առաջնություններին էինք մասնակցում, հիմա ո՞չ. տեսանյութ armtimes.com

Ազգային ժողովի «Քաղաքացիական պայմանագիր» խմբակցության պատգամավոր, Գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Սիսակ Գաբրիելյանը եկել է այն համոզմանը, որ ինչպես շատ հարցերում, ֆուտբոլի հարցում ևս հայ հանրությունը ծայրահեղ մոտեցում է ցուցաբերում:

Վերջինս նորմալ է համարում, որ ֆուտբոլում կարող են և՛ պարտություններ լինել, և՛ հաղթանակներ:

Ըստ նրա՝ Հայաստանի Հանրապետության կառավարությունը չունի և չի կարող ազդեցություն ունենալ ՀՀ ֆուտբոլի ֆեդերացիայի վրա:

«Ցանկացած միջամտություն կարող է հիմք դառնա, որ ՀՀ հավաքականը զրկվի ֆուտբոլի մրցաշարերին մասնակցելուց»,- ասում է նա:

Միաժամանակ օրենսդիր մարմնի ներկայացուցիչը ընդգծում է, որ վերջին տարիներին ՀՀ-ում բազմաթիվ խաղադաշտեր են կառուցվել՝ նկատելով այն, որ աշխարհի շատ հայտնի ֆուտբոլիստների տաղանդը զարգացել է բակային խաղերի ընթացքում. «Այս խաղադաշտերում են ծնվելու ապագա հենրիկմխիթարյանները, խորհենհովհաննիսյանները: ՀՖՖ-ն ևս հսկայական աշխատանք է այսօր կատարում»:

Գաբրիելյանն ասում է՝ շատ կուզենար, որ Մխիթարյանը վերադառնար հավաքական, քանի որ ըստ նրա՝ նա մեր լավագույն ֆուտբոլիստներից է:

Պորտուգալիայի խաղից հետո, որում Հայաստանը ցավալի պարտություն կրեց, պատգամավորը աչքերին չի հավատացել, որ Իռլանդիայի հետ հանդիպմանը մեր հավաքականը կարող է նման խաղ ցույց տալ. «Դա այն խաղն էր, որ մենք ուզում էինք տեսնել»:

Անդրադառնալով այն պնդումներին, թե Ռուբեն Հայրապետյանի ժամանակ հայկական ֆուտբոլը ավելի լավ վիճակում էր, Գաբրիելյանը նկատում է. «Կարծես թե ժամանակին ՀՀ-ն աշխարհի առաջնությանն էր մասնակցում, հիմա ոչ: ՀՀ-ն միշտ էլ, ցավոք սրտի, ունեցել է խոշոր հաշվով պարտություններ: Հավաքականը երբեք չի բավարարել հայ երկրպագուների ցանկությունները»:

Ինչ վերաբերում է նոր մարզչին, ԳԿՄՍԵՍ հանձնաժողովի նախագահը նշում է՝ Եղիշե Մելիքյանն ասել է, որ «վիզ» է վերցնում 2 տարի զբաղվելու հավաքականով:

Առավել մանրամասն՝ «Հայկական ժամանակ»-ի հետ հարցազրույցում: