Պռոշյան համայնքը վերածվել է աղետի վայրի՝ 18 ժամից ավելի է՝ հոսանք չկա, մանկապարտեզներն ու դպրոցը չեն գործում, ապրանքը փչանում է խանութներում aravot.am

Կոտայքի մարզի Պռոշյան համայնքում իսկական աղետ է: Բնակիչներն այդպես են բնորոշում իրավիճակը: Aravot.am-ին Պռոշյանի բնակիչները փոխանցեցին, որ սեպտեմբերի 11-ին 17:30 րոպեից հոսանքազրկվել է Պռոշյան համայնքը:

«Նշել են, որ պատճառը մալուխի վնասվածքն է, եւ յուրաքանչյուր երկու ժամը մեկ թարմացնում են տեղեկատվությունը, թե որ ժամին կվերականգնվի հոսանքը, այդպես հասել ենք մինչեւ սեպտեմբերի 12-ը: Հիմա էլ ասում են, որ կվերականգնվի 17:30-ին՝ այն էլ նախնականով: Մոտավորապես 18 ժամից ավել է՝ Պռոշյան համայնքում հոսանք չկա, դպրոցը եւ մանկապարտեզները չեն գործում: Խանութների սեփականատերերը մեծ վնասներ են կրում, քանի որ սառնարանային ապրանքները փչանում են»,-մեր զրույցում ասաց Պռոշյան համայնքի բնակիչներից մեկը:

Մի պռոշյանցի էլ նշեց, որ անգամ մարդկանց հեռախոսներն են լիցքաթափվել, եւ եթե որեւէ մեկը շտապ օգնության կարիք ունենա, անգամ զանգելու հնարավորություն չեն ունենա:

Փորձեցինք ՀԷՑ-ի կայքում տեղադրված հեռախոսահամարով կապվել Կոտայքի մարզը սպասարկող մասնաճյուղի հետ, սակայն, մեր բոլոր փորձերն ապարդյուն էին, քանի որ հեռախոսազանգերին պատասխանող չկար, իսկ 1-80 համարով զանգելու դեպքում ավտոմատը կրկնում է նույն տեքստը, որ վթար է գրանցված, եւ հոսանքը կվերականգնվի 17:30-ին, ինչին Պռոշյանի բնակիչներն այլեւս չեն հավատում:

Գոհար ՀԱԿՈԲՅԱՆ