«Հրապարակ». Թրամփը չի ունեցել եւ չունի պատերազմը դադարեցնելու ծրագիր hraparak.am

«Հրապարակի» զրուցակիցն ուկրաինացի քաղաքագետ Եվգենի Մագդան է:

- Սեպտեմբերի 7-ին հայտնի դարձավ, որ պատերազմի մեկնարկից ի վեր առաջին անգամ ռուսական զինուժը կարողացել է հարվածել Ուկրաինայի կառավարության շենքին, հրդեհ է բռնկվել: Բարեբախտաբար, ոչ ոք չի տուժել: Պուտին-Զելենսկի հնարավոր երկկողմ հանդիպման մասին խոսակցությունների ֆոնին ինչո՞վ է պայմանավորված այս հարձակումը:

- Ուզում եմ նշել, որ 2025 թ․ հունվարի սկզբին ռուս օկուպանտներն արդեն հարվածել էին կառավարական թաղամասի բնակելի շենքին՝ սպանելով խաղաղ բնակիչների: Կրեմլը բանակցելու ուղիների որոնումը ոչ մի կերպ չի կապում խաղաղ քաղաքների հրետակոծությունը դադարեցնելու հետ: Ցավոք, Դոնալդ Թրամփն օգնում է Պուտինին այս հարցում՝ անտեսելով եվրոպացի քաղաքական գործիչների ցանկությունը՝ հասնել հրադադարի եւ համաձայնելով Ռուսաստանի նախագահի առաջարկին՝ անհապաղ կնքել խաղաղության համաձայնագիր: Թրամփը չի հասկանում, որ անհնար է անհապաղ դադարեցնել ժամանակակից աշխարհի ամենամեծ պատերազմը, եւ Պուտինն օգտագործում է այս թյուրըմբռնումն իր օգտին:

- Այդ հարձակումը դատապարտել են Կիեւի մի շարք գործընկերներ, այդ թվում՝ ԱՄՆ նախագահը հայտարարել է, որ շատ շուտով լուրջ զրույց է ունենալու իր ռուս գործընկերոջ հետ՝ պատերազմի թեմայով: Կհաջողվի՞ Թրամփին կանգնեցնել ռուս-ուկրաինական պատերազմը եւ երկու առաջնորդներին նստեցնել բանակցությունների սեղանի շուրջ:

- Ոչ, այս զրույցը ոչնչի չի հանգեցնի: Թրամփը չունի եւ չի ունեցել ռուս-ուկրաինական պատերազմը դադարեցնելու ծրագիր, որում ԱՄՆ-ն կխաղար առաջատար դեր: Հետեւաբար, Թրամփը փնտրում է հնարավոր հանցակիցներ այս գործում, բանակցություններ է վարում Պուտինի հետ եւ անընդհատ մանեւրում է: Նա ապրում է սեփական երեւակայական աշխարհում, որտեղ բոլորը լսում են նրա խոսքերը, բայց պրակտիկան ցույց է տալիս, որ դա այդպես չէ:

- Ուկրաինայի նախագահը Պուտինի հետ բանակցություններին մղող գործոն է նշում Մոսկվայի վրա առավել ուժեղ ճնշումը: Կրեմլում չեն բացառում Պուտին-Զելենսկի հանդիպումը, բայց նշում են, որ դրա համար անհրաժեշտ նախադրյալներ են պետք:

- Կրեմլը ավանդաբար ստում է, քանի որ հենց Ռուսաստանն է հարձակվել Ուկրաինայի վրա եւ ոչ թե հակառակը: Եվ հենց Պուտինի դիրքորոշումն է որոշում, թե մարտական գործողությունները կավարտվե՞ն։ Սակայն նա դրանում որեւէ շահագրգռվածություն չունի, եւ սա պետք է հնարավորինս հստակ հասկանալ. Ռուսաստանի տնտեսությունն արդեն պատերազմի մեջ է, Ռուսաստանի բնակչությունը, ընդհանուր առմամբ, գոհ է իրավիճակից, եւ կառավարությունը շարունակում է մեծացնել լարվածությունը։ Բացի այդ, Պուտինը զգացել է Հնդկաստանի եւ Չինաստանի աջակցությունը։ Նա որեւէ պատճառ չունի հրաժարվելու Ուկրաինայի դեմ պատերազմից, իսկ Ռուսաստանի չափերն ու միջուկային զինանոցը թույլ են տալիս նրան վստահ զգալ։

- Պուտինը Զելենսկուն Մոսկվա է հրավիրել բանակցությունների համար, Զելենսկին Պուտինին՝ Կիեւ. որքանո՞վ է իրատեսական նախագահների հանդիպումը: Ի՞նչ սպասել այս առումով:

- Պուտինի եւ Զելենսկու միջեւ հնարավոր հանդիպման նախադրյալներ չկան, սա ամենաազնիվ պատասխանն է։ Կրեմլի ղեկավարը փորձում է Արեւմուտքին ցույց տալ, որ պատրաստ է բանակցությունների, Ուկրաինայի նախագահը պարզապես չի կարող իրեն թույլ տալ հրաժարվել խաղաղ բանակցությունների գաղափարից, անկախ նրանից, թե ում կողմից է դա գալիս։ Սա արատավոր շրջան է։ Մինչեւ Արեւմուտքը չունենա ագրեսորի դեմ վճռական գործողությունների ծրագիր, այս իրավիճակը կշարունակվի։ Ուկրաինան շատ բարձր գին է վճարում իր արեւմտյան գործընկերների մտորումների ժամանակի համար՝ իր պաշտպանների եւ քաղաքացիական անձանց կյանքով եւ առողջությամբ, բայց մենք այսօր այլ ընտրություն չունենք։