«Հրապարակ». Իմ կարծիքով` մեզ բացարձակ մեծամասնությունը 2026-ին ձայն է տալու hraparak.am

Հարցազրույց «Քաղաքացիական պայմանագիր» կուսակցության վարչության անդամ, Երեւանի փոխքաղաքապետ Արմեն Փամբուխչյանի հետ

- Երեւանի ավագանու նիստերի դահլիճը վերանորոգվում է, որքա՞ն գումար է ծախսվել, ինչքա՞ն է տեւելու, վերջին անգամ ե՞րբ է վերանորոգվել։

- Վերջին անգամ, որքան գիտեմ՝ երբ կառուցվել է, այդպես էլ եղել է, չգիտեմ՝ երբ է կառուցվել, բայց հիմա իրապես ուներ վերանորոգման կարիք, եթե չեմ սխալվում՝ 90 միլիոնի կարգի։

- Մեծ թիվ չէ՞։

- Ահռելի դահլիճ է, ամբողջությամբ վերանորոգվում է՝ էլ ավելի հարմարավետ դարձնելու համար, թե՛ ավագանու նիստերի, թե՛ գործակարգավարական խորհրդակցությունների համար։ Դա է գինը, եթե որակով վերանորոգում է, խնդիր չկա։

- Շատ է խոսվում Երեւանում օդի աղտոտվածության մասին, մենք՝ բոլորս, զգում ենք դա։ Դրան էլ զուգահեռ, ահռելի քանակով բազմաբնակարան շենքեր են կառուցվում, թույլտվություններ են տրվում։ Այդ ամենը խաթարում է էկոլոգիական վիճակը, Երեւանն այլեւս չի դիմանում այս ծանրաբեռնվածությանը։

- Ժամանակակից քաղաքներում ժամանակակից շինարարության եւ բնապահպանության նորմերը մեկը մյուսին հակադիր չեն, մենք պետք է թույլ տանք եւ խթանենք շինարարությունը, իսկ մյուս կողմից լինենք շատ հետեւողական, որ նրանք օդի կեղտոտվածության բոլոր չափանիշները պահեն։ Դրանց զուգահեռ էլ մեծ քանակությամբ կանաչապատ գոտիներ են ավելացվում քաղաքում։ Ինչպես գիտեք, մեր ծրագրում՝ մինչեւ 250 հեկտար, եւ մենք տարեկան մի քանի տասնյակ հեկտար ավելացնում ենք, ծառատունկ ենք իրականացնում։ Այս ամբողջը կոմպենսացիաների մեջ է, մի կողմից՝ ավելացնել կանաչ տարածքները, մյուս կողմից` հետեւողական լինել շինարարական աշխատանքներին, որպեսզի պահպանվեն նորմերը, եւ, մյուս կողմից, այո, պետք է թույլտվություններ տալ։

- Սեպտեմբերի 20-ին «Քաղպայմանագիր» կուսակցության վարչության ընտրությունն է, Դուք առաջադրվա՞ծ եք։

- Այո, որպես վարչության անդամի թեկնածու՝ առաջադրված եմ։

- Ի՞նչ ակնկալիքներ ունեք ընտրություններից: Կուլիսներում խոսում են նաեւ, որ իշխող ուժն արդեն ոչ պաշտոնապես քարոզարշավը սկսել է։

- Ինչո՞վ է պայմանավորված այդ կարծիքը, որ մենք քարոզարշավ ենք իրականացնում։ Եթե նկատի ունեն, որ մենք իրականացնում ենք բազմաթիվ բարեփոխումներ եւ ծրագրեր, դա կառավարության պարտականությունն է, այսինքն՝ նախընտրական ծրագրի խոստումներն ենք իրականացնում եւ, բնականաբար, պետք է իրականացնենք դա։

- Դե, իշխանությունը չեզոքացնում է ընդդիմությանը, քաղաքական քրեական գործեր, կալանավայրերն ընդդիմադիրներով են լցվել...

- Ես որեւէ մեկին չեմ ճանաչում, որ քաղաքական գործերով կալանավորված լինի կամ բանտերում լինի, ընդդիմությունն ինքն է իրեն չեզոքացրել հանրության դաշտից, որովհետեւ, ըստ էության, չկա ընդդիմություն, եւ դա պայմանավորված է իրենց գործելաոճով, հանրությունն է իրենց չեզոքացրել։ Իսկ ինչ վերաբերում է մարդկանց, որոնք այս պահին բանտերում են, դա ես չէի համարի ընդդիմություն, որովհետեւ տեռորիստական ակտի նախապատրաստումը, որն այն հոդվածներն են, որոնցով իրենք կալանավորված են, դրանք բնավ ընդդիմության եւ քաղաքական պրոցես չեն։ Դա մաքուր քրեաիրավական պրոցես է։

- Միքայել սրբազանին, Ռուբիկ Հակոբյանին կալանավորել են մեկ նախադասություն ասելու համար, մինչդեռ Ձեր կուսակից Ռազմիկ Մկրտչյանը մարդ է ծեծել, բայց հիմա ազատության մեջ է։

- Ուրեմն, մարդ ծեծելը եւ պետական հեղաշրջման, անկարգություններ անելու կոչերը տարբեր քրեական բացատրություններ ունեն, եւ, ըստ այդմ, այդ համեմատությունները տեղին չեն։ Նման կոչ անողները պետք է առնչվեն Քրեական օրենսգրքի, դատարանի եւ կալանավորման հետ։

- Ընտրություններից առաջ ե՞ւս կալանավորումներ կլինեն։

- Այդ հարցը ես համարում եմ անտեղի, որովհետեւ մենք չենք նստում որոշում՝ ում կալանավորենք, ում՝ չէ, դա մեր գործը չէ։ Կլինեն մարդիկ, եթե կշարունակեն պետական հեղաշրջման կոչեր անել, այլ տեռորիստական ակտեր նախապատրաստել, վստահ եմ՝ իրավապահ համակարգը կհայտնաբերի եւ համապատասխան կվերաբերվի այդ մարդկանց։

- Խոսքի ազատության սահմանափակում չէ՞ դա։

- Խոսքի ազատությունը պետական հեղաշրջման հետ բնավ կապ չունի։ Խոսքի ազատությունը դուք տեսնում եք Ազգային ժողովում, Երեւանի ավագանիում, որ շատ հանդուրժող լսում ենք, թե քննադատություններն անգամ հասնում են ակնարկներով կամ ուղիղ վիրավորանքների, բայց երբ հատում է Քրեական օրենսգիրքը, պետք է քրեական պատասխանատվության ենթարկվի։

- Լավ, իսկ դուք մարդկանց հետ շփվո՞ւմ եք, ի՞նչ կարծիք ունեն նրանք ձեր իշխանության մասին, ձեզ ձայն կտա՞ն։ Մենք հարցումներ ենք անում, նկատում ենք, որ մարդիկ շատ հիասթափված են։

- Ես իմ մեջ համոզված եմ, որ մենք 2026 թվականի հերթական ընտրություններում ստանալու ենք Հայաստանի բնակչության, քաղաքացիների բացարձակ մեծամասնության ձայները։

- Հարցումներ արե՞լ եք ձեր թիմի համար։

- Մենք առանձնապես հարցումներ չենք իրականացնում, մենք հստակ շփվում ենք մարդկանց հետ, մարդկանց խնդիրները լսում ենք, խնդիրները լուծում ենք, այնուհետեւ ենք հանդիպում։ Կա մթնոլորտ, երբ դու շփվում ես մարդու հետ, դու հասկանում ես այդ մարդու կողմնորոշվածությունը, մենք դա հասկացել ենք: Իմ անձնական, որպես քաղաքական գործիչ, կարծիքն է, որ մեզ բացարձակ մեծամասնությունը 2026 թվականին ձայն է տալու։

- Դուք ի՞նչ էմոցիաներ ունեցաք, երբ տեսաք Աննա Հակոբյանի եւ Մեհրիբան Ալիեւայի համատեղ լուսանկարները։

- Երկու երկրների ղեկավարների առաջին տիկնայք համատեղ գտնվել են մեծ միջոցառման, եւ շատ նորմալ է, որ հրապարակվեն լուսանկարներ, որեւէ էմոցիաներ չեմ ունեցել։

- Դրակա՞ն եք գնահատում այդ ջերմությունը, ժպիտները։

- Ինչո՞ւ պիտի բացասական գնահատեմ։

- Մեր թշնամի երկրի, մեզ մեծ կորուստներ պատճառած ղեկավարի կինն է։

- Որոնց հետ արդեն խաղաղության ճանապարհին ենք, կարելի է ասել՝ արդեն հաստատված խաղաղություն: Հաստատված խաղաղությունը կա խորացնելու տեղ, ու որեւէ խնդիր չեմ տեսնում այդտեղ։

- Տեղյա՞կ եք, որ հայերը Վերին Լարսում արդեն խնդիրներ ունեն այդ «խաղաղության» պայմանավորվածություններից հետո, ռուսներն ագրեսիվ են տրամադրված։

- Ես իմ հասուն կյանքի ինչ հիշողություն ունեմ, մենք պարբերաբար բոլոր իշխանությունների օրոք Վերին Լարսում ունեցել ենք տարատեսակ խնդիրներ, որոնք հետագայում լուծվել են, եւ դա դրանցից մեկն է։

Մանրամասն՝ տեսանյութում