Արամայիս Հայրապետյան. «Վարդան Ղուկասյանին քրեական հետապնդում են հարուցում պատմամշակութային շինությունն, ըստ էության, փրկելու համար» aravot.am

ՀԿԴ-ում դատավոր Մերի Մոսինյանի նախագահությամբ այսօր կայացավ Գյումրիի քաղաքապետ Վարդան Ղուկասյանի եւ նրա հետ փոխկապակցված անձանց քրեական գործով հերթական դատական նիստը: Հետազոտվեցին արտավարույթային փաստաթղթերը, մասնավորապես, օտարված գույքի կադաստրային գործերը:

Վարդան Ղուկասյանի շահերի ներկայացուցիչ, փաստաբան Արամայիս Հայրապետյանը Aravot.am-ին ասաց. «Ի՞նչ կարեւոր փաստաթղթեր այսօր ապացուցվեցին: Նախ, Աբովյան-262 հասցեի գույքը, որը դատախազությունը ներկայացնում է, որ պատմամշակութային արժեք է: Եվ դա այդպես էլ կա: Դատախազությունը նաեւ նշում է, որ դա օտարելու իրավունք չի ունեցել համայնքապետը, բայց օտարվել է եւ այդ պատճառով քրեական հետապնդում են իրականացնում:

Կադաստրային գործում պարզվեց, որ կա ավագանու որոշում, որտեղ հստակ նշված է, որ դա հանդիսանում է պատմամշակութային շինություն եւ ավագանին որոշել է այն օտարել: Վարդան Ղուկասյանը դա չի որոշել: Որոշումը կայացրել է ավագանին, ընդորում, նշելով պատճառները: Քանի որ երկրաշարժից հետո այն էապես վնասված է եղել եւ ոչ պետությունը, ոչ համայնքն են կարողացել շինությունը փրկել, ուստի համայնքը որոշում է կայացրել այն աճուրդով վաճառել: Ընդորում, աճուրդային հանձնաժողովում կրկին Վարդան Ղուկասյանը չի եղել: Վարդան Ղուկասյանը որպես համայնքի ղեկավար իրավունք չուներ չկատարելու ավագանու որոշումը: Շենքը օտարվել է ավագանու որոշմամբ, ինչը պարտադիր է բոլորի, այդ թվում՝ նաեւ Վարդան Ղուկասյանի համար»:

Մեր ճշտող հարցին, թե տվյալ շենքը ի՞նչ նպատակով է օտարվել, փաստաբանը պատասխանեց. «Օտարվել է վերականգնման նպատակով եւ նպատակը հստակ նշված է: Ընդորում, նախորդ նիստին մենք հետազոտեցինք նաեւ առուվաճառքի պայմանագիրը, որի մեջ որպես հատուկ կետ գնորդի վրա դրված է պարտավորություն՝ այդ շինությունը վերականգնել ըստ ստանդարտների: Եվ այդ շինությունը ստանդարտներով վերականգնվել է:

Նախորդ նիստում հետազոտեցինք նաեւ փորձագետի եզրակացությունը, որով ֆիքսվել է, որ շինության վերականգնումը եղել է բոլոր նորմերի խստիվ պահպանմամբ: Հետեւաբար Վարդան Ղուկասյանին քրեական հետապնդում են հարուցում պատմամշակութային շինությունն ըստ էության փրկելու համար: Եթե դա մնար, մինչ այսօր այդ շինությունը ամբողջապես ոչնչացված կլիներ:

Հետապնդման մեջ նշվում է, որ ինքն է վաճառել, որի իրավունքը չուներ: Չի էլ նշվում, որ ավագանու որոշում է եղել, որ շինությունը վնասված է եղել: Այդ ամբողջ հարցերը շրջանցվել են: Եվ պատահական չէ, որ շրջանցվել են, որովհետեւ չեն կարող հանրությանը համոզել, որ շենքը փրկելու համար անհրաժեշտ է օտարել եւ դա հանցագործություն է: Եվ որպեսզի այդ ամեն ինչը կոծկեն, քողարկեն եւ շրջանցեն, ներկայացրել են քրեական հետապնդման մի ձեւակերպում, որը իրականությունից չի բխում: Եվ պնդում են, թե իբր Վարդան Ղուկասյանը հանցավոր ճանապարհով օտարել է այդ շինությունը: Այնինչ, այսօրվա նիստով հստակ նշվեց, որ օտարումը եղել է սահմանված կարգով եւ օտարման պրոցեսին Վարդան Ղուկասյանը չի մասնակցել:

Մնացած գույքերի մասով մեկ բան հստակ ֆիքսվեց, որ այդ գույքերի նպատակային, գործառնական նշանակությունը նշել է կադաստրը, որը որեւէ տեղ չի նշել, որ այդ գույքը օտարման ենթական չէ: Իսկ հողերի սահմանագծերի որոշման, նպատակային նշանակության, իրավական ռեժիմների պատասխանատու մարմինը Կադաստրային կոմիտեն է: Ստացվում է, որ ամբողջ աշխարհը կարող էր չիմանալ, որ դա, ենթադրենք, կանաչ տարածք է, բայց Վարդան Ղուկասյանը պարտադիր այդ մասին պետք է իմանա՞ր:

Սա էլ է խոսում այն մասին, որ քրեական հետապնդումը թիրախավորված է, այլ ոչ թե օբյեկտիվ հիմքի վար կառուցված»:

Աշոտ ՀԱԿՈԲՅԱՆ