«25 մասնագիտությունների գծով որևէ ուսանող չենք ունենալու Հայաստանում». Ոլորտի փորձագետների մտահոգությունները 168.am

Ինչպես նախորդ տարի, այս տարի ևս բարձրագույն ուսումնական հաստատություններում շատ մասնագիտությունների գծով դիմորդներ չկան։

Ըստ կրթության ոլորտի փորձագետների, նախորդ տարվա փորձը հաշվի առնելով, պատկան մարմինները ոչինչ չարեցին, որպեսզի այս տարի այդ ֆակուլտետները դիմորդներ ունենային։

ՀՀ ԳԱԱ Գիտակրթական միջազգային կենտրոնի (ԳԿՄԿ) դեկան, կրթության ոլորտի փորձագետ, մանկավարժության դոցենտ Ատոմ Մխիթարյանի խոսքով՝ պատկան մարմինները ոչ միայն մեկ տարվա ընթացքում ոչինչ չարեցին, այլև բուհերում պատկերն ավելի վատացավ։

«Արդեն հայտարարվել է, որ 25 մասնագիտությունների գծով որևէ ուսանող չենք ունենալու Հայաստանում։ Այս մասնագիտությունները հիմնականում Ագրարային համալսարանի գյուղատնտեսական մասնագիտություններն են, Պոլիտեխնիկական համալսարանում, ըստ էության, ունենք նման թափուր տեղեր։ Շատ քիչ դիմորդներ են այս տարի դիմել բնագիտական մասնագիտություններով մանկավարժական կրթություն ստանալու համար։ Այսինքն՝ մենք մի քանի տարի հետո այդ ոլորտում ընդհանրապես մասնագետներ չենք ունենալու։ Այս մասնագիտությունները վերականգնելու համար մեզ տասնյակ անգամ ավելի մեծ ռեսուրսներ պետք կլինեն՝ և՛ ֆինանսական, և՛ մարդկային»,- 168.am-ի հետ զրույցում նշեց Ատոմ Մխիթարյանը։

Փորձագետը վստահ է՝ կրթության ոլորտի հետ կապված բոլոր այս գործընթացները տեղավորվում են ՀՀ օրվա իշխանությունների վարած քաղաքականության տրամաբանության մեջ։

«Իշխանությունների ընդհանուր տրամաբանությունը հետևյալն է՝ Հայաստանում չպետք է զարգանա գիտությունը, չպետք է զարգանան արդյունաբերության այնպիսի ճյուղեր, որոնք կապված են գիտության հետ, այլ պետք է զարգանան այն ճյուղերը, որոնք կապված են ծառայությունների հետ։ Մեր երկիրը տեսնում են՝ որպես ծառայություններ մատուցող երկիր, պիտի արևելքից արևմուտք բեռներ ու մարդիկ տեղափոխեն, իսկ Հայաստանը ծառայություններ մատուցի հյուրանոցներում ու ռեստորաններում։ Ահա թե ինչի են տանում կրթության ոլորտում քաղաքականությամբ»,- ընդգծեց Ատոմ Մխիթարյանը։

Կրթության փորձագետ Սերոբ Խաչատրյանի խոսքով՝ այս տարի ևս բուհերում գրեթե պատկերը նույնն է, ինչ նախորդ տարի էր, սակայն այս տարի թափուր տեղերը քիչ են եղել, քանի որ բուհերում հատկացվող տեղերն էականորեն կրճատվել են։ Այս պատճառով էլ ընդհանուր թափուր տեղերը քիչ են եղել։

«Այդուհանդերձ միտումները նույնն են, կրկին դիմորդները քիչ են ագրարային մասնագիտությամբ, ճարտարագիտական և մանկավարժական մասնագիտություններով։ Այս երեք բլոկը շարունակում է ունենալ դիմորդների պակաս։

Մնացած մասնագիտություններով առանձնապես էական փոփոխություն չկա»,- 168.am-ի հետ զրույցում նշեց Սերոբ Խաչատրյանը։

Հարցին՝ այդ մասնագիտությունները դիմորդների համար գրավիչ դարձնելու համար ի՞նչ է արել ԿԳՄՍ նախարարությունը, Սերոբ Խաչատրյանը պատասխանեց, որ նախարարությունը ֆրագմենտար ինչ-որ լուծում տվել է՝ այդ մասնագիտություններով կրթաթոշակ է տալիս՝ 70-80.000 դրամ։

Փորձագետի կարծիքով՝ այս քայլն ապագա դիմորդների մի փոքր խմբի կարող է մոտիվացնել, բայց գումարի համար, այսինքն՝ դիմորդը կարող է գնալ բուհ, 4 տարի սովորել, այդ թոշակը ստանալ, հետո դպրոց չգնա աշխատելու։

«Այստեղ խնդիրը շատ ավելի խորքային է, այսինքն՝ երեխաներն ու ծնողները հոյակապ գիտեն՝ մեր երկրում որ մասնագիտություններն են ավելի հարգի։ Տեսեք, իրավաբանական գծով գրեթե անվճար տեղեր չկան, բայց դիմորդները շատ են, նույնը՝ բժշկականում։ Մարդիկ տեսնում են՝ մեր երկրում ովքեր են գումար աշխատում, գնում են այդ գծով։ Որքան էլ ասում են՝ թոշակ ենք տալիս, ուսանողը գիտի, որ ավարտելուց հետո այդ մասնագիտությունը շուկայում բարձր վճարվող չէ։ Անընդհատ թմբկահարում են, թե ուսուցիչ կա, որ 600.000 դրամ է ստանում, բայց Հայաստանում սկսնակ քննիչն է 600.000 ստանում։ Պարզ է, որ մարդը կցանկանա դառնալ քննիչ, որովհետև 600.000 մեկնարկային աշխատավարձ կունենա»,- պարզաբանեց փորձագետը։

Ըստ նրա, այստեղ միայն գումարի հարցն էլ չէ, որովհետև այսօր ուսուցիչ աշխատելը դժվար է ոչ միայն նրա համար, որ աշխատավարձն է ցածր, այլև աշխատելն է դժվար։

«Դժվար է այսօր աշխատել հեռախոսներից ու սոցիալական ցանցերից ահռելի կախվածություն ունեցող երեխաների հետ։ Մինչև հիմա չեմ հասկանում՝ ինչու նախարարությունը չի արգելում հեռախոսների գործածումը դպրոցում, շատ երկրներ գնացել են այդ քայլին։ Համակարգային պետք է դա արգելել»,- ընդգծեց Սերոբ Խաչատրյանը։