Ո՞ր ընտանիքներում կլինեն խնդիրներ. հոգեբանը` դպրոցներում դասերը 8։15–ին սկսելու մասին sputnik

ԵՐԵՎԱՆ, 30 օգոստոսի – Sputnik. Սեպտեմբերի 1–ից, երբ դպրոցներում դասերը սկսեն ժամը 8։15–ից, խնդիրներ կլինեն այն ընտանիքներում, որտեղ չեն հետևում երեխայի քնի ռեժիմին, այսինքն՝ քնելու մշակույթը, որպես այդպիսին, ընտանիքում ձևավորված չէ։ Sputnik Արմենիայի հետ զրույցում այս մասին ասաց «Ուիգմոր կանանց և երեխաների հիվանդանոց»-ի կլինիկական հոգեբան, հոգեթերապևտ, քնի մասնագետ Էմմա Արզիևան։

Ավելի վաղ հայտնել էինք, որ քաղաքապետարանի որոշմամբ` սեպտեմբերի 1-ից Երևանի բոլոր հանրակրթական դպրոցներում դասերը կսկսվեն ժամը 08:15-ին: Նպատակներից մեկն առավոտյան ժամերին երթևեկությունը թեթևացնելն է։

Արզիևան հիշեցնում է, որ Առողջապահության համաշխարհային կազմակերպությունը հստակ սահմանել է, թե որ տարիքային շեմում որքան պետք է քնի երեխան. օրինակ` կրտսեր դպրոցականների համար դա 10–11 ժամն է։

Ըստ նրա` այն ընտանիքներում, որտեղ պահպանվում է քնի ռեժիմը և երեխան քնում է մինչև 21։00–21։30, նրանց արթնացնելու կարիք չկա. նրանք առավելագույնը մինչև ժամը 07։30 ինքնուրույն արթնանում են։ Արզիևայի կարծիքով` եթե երեխային ստիպողաբար ենք առավոտյան արթնացնում, նշանակում է, որ նրա ռեժիմը վերափոխելու կարիք կա։

ՀՀ–ում լրացուցիչ ֆինանսավորում կտան և՛ բարձր, և՛ ցածր կատարողական ցուցաբերած դպրոցներին

Նույնն էլ, ըստ նրա, վերաբերում է դեռահասներին, որոնք իրենց տարիքային առանձնահատկությունից ելնելով` հնարավոր է` ըմբոստանան ու անգամ քնեն կեսգիշերն անց։

Նա ցավով է արձանագրում, որ հայկական մշակույթում ընդունված է առավոտյան շատ ուշ արթնանալը։ Օրինակ` եթե Եվրոպայում մարդիկ կարող են արթնանալ ժամը 6–ին ու գնալ աշխատանքի, ապա մեզ մոտ լավագույն դեպքում կյանքը սկսում է ակտիվանալ առավոտյան ժամը 10–11–ից սկսած։

Արզիևան այն համոզման է, որ մանավանդ ամառային երկար արձակուրդից հետո երեխային դպրոցական նոր` փոփոխված ժամային ռեժիմին սովորեցնելու համար ծնողները պետք է մի քանի օր շուտ սկսեն նրանց նախապատրաստել։ Այդ պատճառով, ըստ նրա, դասերը 8։15 սկսելու մասին որոշումը ոչ թե ուսումնական տարվա մեկնարկից 4 օր առաջ պետք է հրապարակեին, այլ շատ ավելի շուտ։

«Ամբողջ ամառ երեխաներին թողնում են, որ արթնանան ժամը 9–ից կամ 10–ից հետո և հենց սեպտեմբերի 1–ին արդեն սկսում են առավոտյան ժամը 6–ին կամ 6։30 արթնացնել։ Այս դեպքում երեխայի մոտ արդարացի դժգոհություն կառաջանա, բայց, միևնույնն է, պետք է թիրախավորել ռեժիմին հետևելու սկզբունքը։ Ցավոք, կան ընտանիքներ, որոնք ռեժիմի մարդիկ չեն, և նրանք գրեթե միշտ ամենուր ուշանում են։ Բարեբախտաբար, կան ընտանիքներ էլ, որոնք պահում են ռեժիմն անկախ նրանից` կիրակի է, երկուշաբթի է, ամառային արձակուրդներ են, թե ուսումնական պրոցես է»,– նշեց Արզիևան։

ՀՀ–ում սեպտեմբերի 1–ից մի շարք առարկաներ հին դասագրքերով կդասավանդվեն

Թե որքանով դպրոցական դասերի շուտ սկսելը կթեթևացնի Երևանի երթևեկությունը, հոգեբանը դժվարացավ ասել, սակայն այն, որ երեխան կարող է ավելի շատ ժամանակ ունենալ խաղալու, իր արտաժամյա պարապմունքների համար, դա միանշանակ է։

Այնպես, որ ըստ նրա, դպրոց շուտ գնալու մեջ պետք չէ բացասական երևույթ փնտրել. ընդամենը երեխան պետք է ճիշտ ժամի քնի, լրացնի իր 10–11 ժամ քնի ռեժիմը, որպեսզի առավոտյան հեշտությամբ արթնանա։

Հիշեցնենք, որ մինչ այս փոփոխությունը Երևանի դպրոցներում դասերը սկսվում էին 08։30–ին։