Ադրբեջանի շահն այն է, որ մենք այստեղ չլինենք, Նիկոլն ասում է՝ ոչինչ, վստահություն դեռ ձեռք կբերենք․ Արթուր Մարտիրոսյան 168.am

Հայաստանը վաշինգտոնյան փաստաթղթից որևէ բան չի ստացել, իսկ Փաշինյանը ստացել է այն, ինչի համար բանակցում էր՝ անձնական շահերը բավարարելու, իր քաղաքական ուժի վերարտադրման հարցում։ Մինչև բանակցությունների սկիզբը բանակցողը մի կարևոր հարց է ձևակերպում՝ ո՞րն է լինելու մեզ համար լավագույն արդյունքը։ Իրատես լինելով՝ այն պետք է պատկերացնել, և ապա հասկանալ, թե քո շահերի ո՞ր տարբերակներն են քեզ բավարարելու։ Երբ սրանք ասում են, թե հասել են լավագույնին, բայց տեսնում ենք, որ ոչինչ չենք ստացել, պետք է մտածել՝ նրանք ինչպե՞ս են հասկանում և մեկնաբանում շահերը։ 168TV-ի «#ՕրաԽնդիր» հաղորդման ժամանակ նման կարծիք հայտնեց բանակցային մասնագետ, կոնֆլիկտաբան Արթուր Մարտիրոսյանը։

«Փաշինյանի անձնական շահն այն է, որ նա այդ թուղթը բերել և ցույց է տալիս՝ որպես խաղաղության թուղթ, դա կարևոր է նրա վերընտրվելու համար։ Դրան զուգահեռ՝ կա շատ ավելի հիմնարար հարց։ Դա այն է, որ իրենք ուզում են ավարտել սկսած գործը՝ Արցախից վերջնական հրաժարումը, և դա է, որ իրենց պատկերացմամբ՝ պետք է ստեղծի պայմաններ «նոր Հայաստանի» ապագայի համար, իբր՝ խաղաղություն և զարգացում պետք է լինի։ Երբ այս շղթան փորձում ենք հասկանալ և վերլուծել, տեսնում ենք, որ այն ինչ-որ չափով հիմնված է թյուրընկալումների, առասպելների կամ կիսատ-պռատ հասկացած տեսությունների վրա»,- ասաց փորձագետը։

«Սրանք ասում են, որ մեզ լավ հարաբերություններ են պետք Ադրբեջանի և Թուրքիայի հետ, և դա փոխելու է մեր ապագան։ Կարծես վատ բան չեն ասում։ Բայց ինչպե՞ս ենք դրան հասնելու։ Սկզբից ևեթ Փաշինյանն ասում էր, թե բոլորն են հաղթելու, և Ադրբեջանի շահերը ևս պետք է նկատի ունենալ։ Դա ևս վատ բան չէ, քանի որ, երբ դու բանակցում ես, պետք է հասկանաս մյուս կողմի շահերը։ Բայց մյուս կողմի շահերը վնասում են մեր շահերին։ Իրենց շահն այն է, որ մենք այստեղ չլինենք, և իրենք այդ մասին բացահայտորեն ասում են։ Ի՞նչ է, մենք, միևնույն է, պետք է շարունակենք նույն ուղո՞վ։ Իրենք ասում են՝ այո։

Ադրբեջանը Հունգարիայում խաղացող, ազգությամբ հայ ֆուտբոլիստին վիզա չի տալիս, հետապնդում է, այսպես կոչված, «Արևմտյան Ադրբեջանի» գաղափարը, ասում են՝ ոչինչ, կշարունակենք, որ վստահություն ձեռք բերենք»,- նշեց Արթուր Մարտիրոսյանը։

Հասարակական գործչի կարծիքով՝ երբ մյուս կողմը քեզ հետ չի խաղում, թյուրիմացություն է, եթե դու շարունակում ես անել նույն բանը և չես հասնում նպատակներիդ․

«Միգուցե Փաշինյանի գերնպատակն անձնական է՝ նա այդ ամենն անում է, քանի որ դա պետք է բավարարի իր անձնական շահը։ Այս ընթացքում շատ բան կարելի էր անել։ Եթե իրենք հայկական շահը պատկերացնում են Արցախից հրաժարումը, դա արդեն իսկ լուրջ խնդիր է։ Բանակցողը պետք է հասկանա, որ թեև մյուս կողմերի հետ է բանակցում, բայց նա նաև իր հանրության հետ պետք է բանակցի։ Այն, ինչ նա բանակցել է, պետք է վաճառի նաև ներսում։ Բայց արդյո՞ք մենք ունենք բավարար կոնսենսուս Հայաստանում, էլ չասած՝ հայության մեջ, որը նրան լեգիտիմություն է տալիս անելու այն, ինչ անում է։ Եթե դա չկա, խնդիր է, և այդ պատճառով Փաշինյանը կոշտ ձևերով փորձելու է վաճառել մեզ վրա այն, ինչ ստացել է»:

«Ժամանակին պահանջում էինք հրապարակել, այսպես կոչված, «խաղաղության պայմանագրի» 17 կետերը։ Չէին հրապարակում, և հիմա արդեն պարզ է, թե ինչու։ Եթե մենք ունենայինք սկզբնական տեքստը, որը հետո կողմերը փորձում են իրենց շահերին համապատասխան փոփոխել և տարբերակներ առաջարկել, կհամեմատեինք։ Բայց այդ 17 կետում նոր բան չկա, Հելսինկյան դրույթներն են, օրինակ՝ տարածքային ամբողջականությունը, բայց չկա ազգերի ինքնորոշումը։ Բավարարվել են այն պահանջները, որոնց մասին միշտ խոսում էր Ալիևը»,- ասաց Արթուր Մարտիրոսյանը:

Մանրամասները՝ տեսանութում