Մարզերում համաճարակ է. թաքցնում են, կաթից ստացված սննդամթերքները խիստ վտանգավոր են. Աշոտ Հարությունյան 168.am

Գյուղատնտեսության նախկին փոխնախարար Աշոտ Հարությունյանն ահազանգում է՝ Հայաստանը պարենային անվտանգության խնդիրների առաջ է կանգնելու. դրա մասին են փաստում անգամ Վիճակագրական կոմիտեի հրապարակած պաշտոնական թվերը։

«Ամեն անգամ ասում եմ՝ ունենալու ենք խայտառակ պատկեր, որովհետև նվազել են ցանքատարածքները, քչացել է բերքը, միևնույն ժամանակ, ինչ միջոցառում այս Կառավարությունն անում է, անում է կիսատ-պռատ։

Օրինակ, ըստ իրենց հրապարակած թվերի, նախորդ տարիների համեմատ՝ 2024 թվականին 316.000 տոննա ցորեն է ներմուծվել Հայաստան, տեղում արտադրվել 120.000 տոննա։ Այս երկու թվից՝ 436.000 տոննա, միայն մեր սննդի համար պահանջվում է 386.000 տոննա, իսկ եթե այս թվին գումարում ենք նաև սերմացուի, անասնակերի համար անհրաժեշտ ցորենի թիվը, հացի համար մինուս ենք ստանում։

Մեկ անձի հաշվարկով նախատեսված 378 գրամ ցորենի չափը Կառավարությունը պակասեցրել է 366 գրամի։ Այս թվերը նշանակում են, որ անգամ իրենց հրապարակած թվերով ունենալու ենք խնդիրներ»,- ասաց Աշոտ Հարությունյանը։

Նրա դիտարկմամբ՝ հանրապետությունում այս տարի գրանցվել է աշնանացան ցորենի ցանքերի ամենախայտառակ ցուցանիշը՝ 47.000 հեկտար։

«Ցանք չեն արել, հանել են դրա համար արվող ծախսերը։ 7000 հեկտարով պակասել են ցորենի ցանքերը»,- ասաց Աշոտ Հարությունյանը՝ ընդգծելով՝ ցանքատարածությունների պակասին զուգահեռ՝ այս տարի զգալի քանակով պակաս է ներկրվել նաև ցորեն։

«Այսօր հացի խնդիր կա. ո՞ւր են բյուջեից ցորենի համար հատկացված գումարները»,- դիմելով Կառավարության անդամներին՝ հարցրեց գյուղատնտեսության նախկին փոխնախարարը՝ բյուջեից հատկացվող գումարների համատեքստում ընդգծելով՝ անգամ գարնանացանի համար հատկացված գումարները բյուջեից չեն հատկացրել, իսկ դա անհրաժեշտ էր, որ մարդիկ գարնանացանից հետո զբաղվեին նաև աշնանացանով։

Աշոտ Հարությունյանը նաև հավելեց՝ պարենային անվտանգության հարցում խնդիրներ ունենք նաև կաթի և մսի հարցում։

«Մարզերում համաճարակ է, չեն հայտարարում. կրկնում եմ՝ բրուցելոզի և դաբաղի բռնկում կա։ Կաթից ստացված սննդամթերքները խիստ վտանգավոր են։ Կենդանիերը հիվանդ են, քաշ են կորցնում։ Կաթ ստանալ հնարավոր չէ»,- հայտարարեց Հարությունյանը։

Հարցազրույցի մանրամասները՝ տեսանյութում։