19 մլն տարեկան եկամուտ, 25 մլն վարկ. որքա՞ն ունեցվածք ունի Քաղաքաշինության կոմիտեի ղեկավարը armlur.am

Դպրոցում ցնցուղ ու կախիչ պոկելուց հետո ՀՀ Քաղաքաշինության կոմիտեի նախկին նախագահ Արմեն Ղուլարյանի սկանդալային ազատումից կարճ ժամանակ անց Կառավարությունը դժվարությամբ, բայց նրան փոխարինող գտավ։ Քաղաքաշինության ոլորտում երկարամյա փորձ ունեցող Ղուլարյանին փոխարինեց Հայաստանի ճարտարապետության եւ շինարարության Հայաստանի ազգային համալսարանի ռեկտոր Եղիազար Վարդանյանը։

Վարդանյանը ռեկտորի պաշտոնին նշանակվել է 2020 թվականին։

Այսպիսով՝ ներկայացնենք, թե ինչ ունեցվածք է հայտարարագրել Քաղաքաշինության կոմիտեի նախագահ Եղիազար Վարդանյանը։

Եղիազար Վարդանյանը հայտարարագրել է միանձնյա սեփականությամբ 2 անշարժ գույք՝ անհատական բնակելի տուն եւ հողամաս։ Անհատական բնակելի տունը գտնվում է Երեւանում եւ ձեռք է բերել 2012 թվականին, երբ Ճարտարապետության եւ շինարարության Հայաստանի ազգային համալսարանի (ՃՇՀԱՀ) աշխատակազմի ղեկավարն էր, որտեղ նույն պաշտոնում աշխատել է 2006-2014 թվականներին։ Իսկ հողամասը ձեռք է բերել 2011 թվականին. այն գտնվում է Կոտայքի մարզի քաղաք Ծաղկաձորում։

Տրանսպորտային միջոցներ Կոմիտեի ղեկավարը չի հայտարարագրել։ Բանկային հաշիվների մնացորդները կազմել են 3 մլն 139 հազար դրամ, կանխիկ դրամական միջոցները կազմել են 30 մլն 800 հազար դրամ, 19 հազար 500 եվրո և 24 հազար 900 դոլար։ Հաշվետու տարվա եկամուտները կազմել են 19 մլն 124 հազար, որից 6 մլն 303 հազարը աշխատանքի վարձատրություն է ՃՇՀԱ համալսարանից, 1 մլն 73 հազարը ևս նույն համալսարանից, սակայն Քաղաքացիաիրավական այլ պայմանագրերից է ստացել, 9 մլն 579 հազար դրամը աշխատանքի վարձատրություն է Կոմիցեից։

Նշենք որ Վարդանյանը այս պաշտոնը զբաղեցնում է 2024 թվականի մարտի 21-ից։ Եկամուտներից 2 մլն 167 հազարը եկամտահարկի վերադարձ է։ Ստացված վարկերի և փոխառությունների մայր գումարի մնացորդը հաշվետու տարվա դեկտեմբերի 31-ի դրությամբ կազմել է 25 մլն 635 հազար դրամ, որը բնակարանի հիփոթեքի մայր գումարի մնացորդն է։

Վարդանյանը հանդիասանում է Ճարտարապետության և շինարարության Հայաստանի ազգային համալսարան հիմնադրամի Հոգաբարձուների խորհրդի նախագահը։

Էմմա Միքայելյան