«Հրապարակ»․ Սրանք քրեականացրել են անգամ իշխանափոխության ցանկություն ունենալը hraparak.am

Շիրակի թեմի առաջնորդ Միքայել արքեպիսկոպոս Աջապահյանի գործով դատական նիստերի ընթացքում սկսվել է գործում առկա ապացույցների ուսումնասիրությունը։ Հանրային մեղադրողը ներկայացրել է խուզարկությամբ Աջապահյանի տնից հայտնաբերված համակարգչում առկա՝ «Օրագիր» անվանումով ֆայլի բովանդակությունը, որտեղ Սրբազանը ըստ օրերի գրառումներ է կատարել։ Մեղադրողն ընթերցել է Միքայել Աջապահյանի օրագրից մի քանի հատված, որոնցում արքեպիսկոպոսը նշել է, թե որ ԶԼՄ-ներին ինչ հարցազրույցներ է տվել, թե տվյալ հարցազրույցներն ինչ դիտումներ եւ արդյունքներ են գրանցել սոցիալական ցանցերում։ Մեջբերված հատվածներից մեկում նշվում է․ «Այսօր իմ խոսքի դիտումները գերազանցեցին 60 հազարը, որն աննախադեպ է որեւէ սքեմավորի համար»։ Աջապահյանի օրագրից մեկ այլ մեջբերման մեջ նշվում է․ «Թեեւ ձայնս դեռ քաշված է, սակայն հարցազրույց տվեցի 168.am-ին, որտեղ խստագույնս դատապարտեցի այս իշխանությանը՝ կոչ անելով հեղաշրջման»։

Ըստ մեղադրողի՝ այդ գրառումներով ապացուցվում է Աջապահյանի դիտավորությունը եւ նրան ներկայացված մեղադրանքը, մասնավորապես՝ իշխանությունը բռնությամբ փոխելու կոչեր անելու հետ կապված։ «Քանի որ մեղադրանքը ներկայացված է նաեւ 2024 թվականի փետրվարի 3-ին հնչեցված կոչերի վերաբերյալ, դրա մասին մեղադրյալը նաեւ իր օրագրում մանրամասն նշումներ է կատարել, ինչը կրկին հիմնավորում է նրա դիտավորությունը՝ իշխանությունն իրացնելուն ուղղված կոչեր կատարելու վերաբերյալ»,- նշել է մեղադրողը։ Այսինքն՝ մարդու մեղքի ապացույցներ ոչ թե մեղադրանքն առաջադրելուց առաջ են ունեցել, այլ մեղադրանքը հարուցելուց եւ նրան կալանավորելուց հետո են ինչ-որ բաներ կցում-կցմցում, որ հետին թվով կարողանան ապացուցել նրա մտադրությունները:

Մենք տեղեկացանք, որ Աջապահյանի «օրագրում» կան նաեւ գրառումներ, որոնք տարբեր մարդկանց են վերաբերում, նրանց հետ ունեցած հանդիպումներին ու մասնավոր զրույցներին: Օրինակ` Աջապահյանը գրել է, թե որ օրը, որ ժամին եւ ում հետ է հանդիպել, քննարկել Նիկոլ Փաշինյանին իշխանությունից հեռացնելու հարցը: Հնարավո՞ր է արդյոք, որ այդ գրառումները հիմք դառնան եւ Աջապահյանի հետ՝ Փաշինյանին իշխանությունից հեռացնելու մտադրություն ունեցող մյուս անձանց եւս մեղադրանքներ առաջադրվեն, ու նրանք անգամ կալանավորվեն՝ հարցրինք փաստաբան Միհրան Պողոսյանից: «Քանի որ Միքայել սրբազանն առանց որեւէ հիմքի կալանավորվել է, եւ հաշվի առնելով այս իշխանության գործելաոճը, անպայման չէ, որ ինչ-որ մեկի անունն ինչ-որ մեկի օրագրում առկա լինի: Այնքան փաստական տվյալներ կան, որ անձանց կալանավորել են անհիմն, ասենք, օրինակ, ձվածեղ պատրաստելու համար եւ այլն: Կամ, օրինակ, Տիգրան Գալստյանին կալանավորել են՝ իր աշխատանքով պայմանավորված, համապատասխան ծածկույթներ ունենալու համար: Ի՞նչ է ստացվում, ստացվում է, որ այս մարդիկ երկարաժամկետ կալանավորվել են ոչ մի բանի համար: Կարծում եմ` լրացուցիչ առիթ չկա այստեղ: Հարցը զուտ իշխանության ցանկության մեջ է: Եթե ցանկանան ինչ-որ մեկին տանել կալանքի, նրանց այդ ամենի համար պետք չէ հանցակազմ»,- ասաց փաստաբանը:

Ծանո՞թ եք օրագրի բովանդակությանը, ո՞ւմ անուններն են այնտեղ հիշատակված։ «Այնքանով, ինչքանով հրապարակվել է դատական նիստերի ընթացքում: Մեծ մասշտաբի տեղեկությունների այս մասով չեմ տիրապետում, սակայն այս ամբողջ պրոցեսի ընթացքում ոչ մեկը չի կատարել ապօրինի արարք: Եթե անձն անօրինական ոչինչ չի արել, ի՞նչ կապ ունի, թե ում հետ է հանդիպել եւ ինչ է խոսել: Ի վերջո, իշխանություն զավթելու փորձն ու իշխանափոխության ցանկությունը շատ տարբեր բաներ են: Պետք է տարանջատել դրանք: Այս մարդիկ քրեականացրել են իշխանափոխության ցանկություն ունենալը: Բայց դա լրիվ օրինական գործընթաց է»: