Թուրքիան Ադրբեջանում ռազմական հենակայաննե՞ր է ստեղծում 1in.am

Թուրքիայի նախագահ Ռեջեփ Թայիփ Էրդողանը գեներալ-լեյտենանտ Սոներ Օրուջղլուին նշանակել է «Ադրբեջանում ծառայողական խմբի հրամանատար»: Այդ մասին հաղորդում են Բաքվի լրատվամիջոցները:

Ըստ այդմ, նա փոխարինել է գեներալ-գնդապետ Բախտիյար Էրսային, որ վերջերս Էրդողանի հրամանագրով նշանակվել է Թուրքիայի ԶՈՒ ցամաքային զորքերի առաջին բանակի հրամանատար:

Գեներալ Բախտիյար Էրսայը պաշտոնապես Բաքվում ծառայության է անցել 2021 թվականին՝ որպես Ծառայողական խմբի հրամանատար, իսկ մեկ տարի հետո՝ նշանակվել Ադրբեջանի պաշտպանության նախարարի խորհրդական:

Ադրբեջանական ոչ պաշտոնական աղբյուրները, սակայն, պնդում են, որ գեներալ Էրսայը Բաքու է գործուղվել 2020 թվականի տավուշյան մարտերի օրերին: Նախապես նա ունեցել է մի խնդիր՝ պարզել իր հրամանատարական կետում սպանված, ադրբեջանական բանակային կորպուսի հրամանատար գեներալ Հաշիմովի մահվան հանգամանքները: Բախտիյար Էրսայը, ըստ վստահելի աղբյուրների, քառասունչորսօրյա պատերազմի ընթացքում փաստացի հանդիսացել է Ադրբեջանի ԶՈՒ ԳՇ պետ:

Բաքվի լրատվամիջոցների տեղեկություններով, Ծառայողական խմբի նոր հրամանատար Օրուջօղլուն ունի գեներալ-լեյտենանտի կոչում և մինչ այդ պաշտոնին նշանակվելը հանդիսացել է Բաքվում Թուրքիայի դեսպանատան ռազմական կցորդը: Առայժմ պարզ չէ՝ նա կնշանակվի նաև Ադրբեջանի պաշտպանության նախարարի խորհրդակա՞ն, թե՝ ոչ:

Այս տեղեկատվության ինտրիգն այն է, որ առաջին անգամ Բաքուն հրապարակայնացնում է իր ԶՈՒ կառուցվածքում Թուրքիայի զինվորականներից կազմված Ծառայողական խմբի առկայության փաստը: Խոսքն ի՞նչ խմբի մասին է, ի՞նչ թվակազմ և կառուցվածք ունի այն և ո՞րն է նրա բուն գործառույթը՝ այդ մասին որևէ տեղեկություն հայտնի չէ:

Վերջին շրջանում Բաքվի մի շարք ընդդիմադիր գործիչներ, վերլուծաբաններ և քաղաքագետներ միասնական տեսակետ են հայտնում, որ Ադրբեջանում «պետք է թուրքական ռազմահենակայաններ ստեղծվեն»: Ըստ երևույթին, թուրքական Ծառայողական խմբի առկայության գաղտնազերծումն այդ ուղղությամբ առաջին քայլն է: