«Հրապարակ». Այս գրասենյակի վրա ղեկավար չի գալիս hraparak.am

Միջազգային իրավական հարցերով ներկայացուցիչ, գրասենյակի ղեկավար Լիպարիտ Դրմեյանը վարչապետի որոշմամբ երեկ ազատվեց պաշտոնից: Ազատումը հաջորդեց Նիկոլ Փաշինյանի՝ նախորդ օրվա հոխորտանքներին, երբ կառավարության նիստից հետո հայտարարեց, թե կառավարությունը չի կատարելու «Հայաստանի էլեկտրական ցանցերի» բռնագանձման քայլերն արգելող Ստոկհոլմի արբիտրաժի հրատապ որոշումը, ապա հայտարարեց՝ հակառակ դիրքորոշում ունեցող պաշտոնյաները պետք է լքեն գործադիրը։ «Կառավարությունը ես եմ ... չի կարող որեւէ մեկն իմ դիրքորոշմանը հակասող դիրքորոշում ունենալ: Ընդհանրապես, եթե կառավարությունում մարդիկ կան, որ իմ դիրքորոշմանը հակասող դիրքորոշում ունեն, հենց հիմա թող դիմում գրեն ու շենքերից դուրս գան, եթե ոչ, ես՝ ինքս նրանց կհանեմ»,- ասել էր նա։

Իսկ վարչապետի ենթակայությամբ գործող Միջազգային իրավական հարցերով Հայաստանի ներկայացուցչի գրասենյակն ընդամենը հայտարարել էր, որ միջազգային արբիտրաժի որոշումը պարտադիր է կատարման համար: Նման հայտարարություն արել էր նաեւ արդարադատության նախարար Սրբուհի Գալյանը, սակայն երեւի իր վերադասին ճանաչելով` տիկինը վերապահում էր հայտնել, որ «միջազգային կոնվենցիայով կա հնարավորություն՝ այդ որոշումը չկատարելու, եթե դա հակասում է հանրային կարգին»: Մինչդեռ, պարզվում է` այդ կարգը գործում է, եթե վեճը երկու մասնավոր ընկերության միջեւ է, իսկ ՀԷՑ-ի պարագայում մյուս կողմը պետությունն է։ Ինչեւէ, Փաշինյանի սենսացիոն հայտարարությունից հետո իրավաբաններն ու սահմանադրագետներն արձանագրեցին, որ պետության գլուխն իրեն հերթական անգամ վեր է դասում մայր օրենքից։ ՀՀ Սահմանադրության 147-րդ հոդվածում ասվում է․ «Կառավարությունը կազմված է վարչապետից, փոխվարչապետներից եւ նախարարներից... «Կառավարության գործունեության կարգը Կառավարության ներկայացմամբ սահմանվում է օրենքով», եւ որոշումներն էլ ընդունվում են կոլեկտիվ։

Չնայած բարձրացած աղմուկին, Փաշինյանը, տրորելով օրենքը, Դրեմյանին ազատելու որոշում կայացրեց` ուղերձ հղելով կառավարության մյուս անդամներին, որ չհամարձակվեն իր ասածներին հակասող մտքեր հայտնել, որ ինքն օրենքից ու իրավական ակտերից վեր է կանգնած։ Մենք տեղեկացանք, որ գրասենյակի ղեկավար Լիպարիտ Դրմեյանին ազատել են անհարգալից կերպով, առավոտյան նրան ընդամենը վարչապետի աշխատակազմից տեղեկացրել են, որ ազատված է։

Հիշենք, որ Միջազգային հարցերով գրասենյակի նախկին ղեկավար Եղիշե Կիրակոսյանն էլ, որ 2018-ից ղեկավարում էր գրասենյակը, հեռացավ այս տարվա մարտին` համաձայն չլինելով Նիկոլ Փաշինյանի վարած քաղաքականությանը: Իհարկե, չհամարձակվեց բացահայտ խոսել այդ մասին, նույնիսկ վարչապետին ուղղված շնորհակալական խոսք ասաց, բայց նրա հեռանալուց դեռ ամիսներ առաջ ԶԼՄ-ները գրում էին, որ Կիրակոսյանը համաձայն չէ վարչապետի վարած քաղաքականությանը՝ Հայաստանի միջազգային հայցերը` Ադրբեջանի դեմ, միջազգային դատական ատյաններից հետ կանչելու մասով, որտեղ ինքն ահռելի աշխատանք էր կատարել, եւ կարող էին արդյունքներ ունենալ։ Իսկ հայցերից հրաժարվելու պահանջն արդեն ներառված է Խաղաղության պայմանագրում։

Թվում էր, թե Դրմեյանը «կպարի» Փաշինյանի «դուդուկի» տակ, քանի որ իր նշանակումն ի սկզբանե «խոցելի» էր․ մենք գրել ենք, որ Լիպարիտ Դրմեյանը Հակակոռուպցիոն դատարանի դատավոր Լիլի Դրմեյանի եղբայրն է, վճռաբեկի նախկին դատավոր Մամիկոն Դրմեյանի որդին: Ինքնին նրա ներկայությունը ներկայացուցչի գրասենյակում խնդրահարույց էր` էթիկական տեսակետից, քանի որ ՄԻԵԴ գանգատների առարկա ակտերի մի մասն էլ հենց այս դատավորի ձեռքի տակով են անցել, ուստի նրա որդու համար բավականին բարդ է անաչառ լինելը: Բայց, ինչպես տեսանք, Դրմեյանը գործել է իբրեւ պրոֆեսիոնալ՝ չպատկերացնելով գլխին գալիքը։

ՀԱԿ փոխնախագահ Լեւոն Զուրաբյանը Փաշինյանի վերջին օրերի հայտարարությունների եւ Դրմեյանին ազատելու որոշման վերաբերյալ դատախազությանը հանցագործության մասին հաղորդում է ներկայացրել՝ ՀՀ Սահմանադրությունից եւ օրենքներից մի շարք հոդվածներ դնելով դիմումի հիմքում․ «Յուրաքանչյուր ոք ունի իր կարծիքն ազատ արտահայտելու իրավունք: Այս իրավունքը ներառում է սեփական կարծիք ունենալու, ինչպես նաեւ՝ առանց պետական եւ տեղական ինքնակառավարման մարմինների միջամտության եւ անկախ պետական սահմաններից` տեղեկատվության որեւէ միջոցով տեղեկություններ ու գաղափարներ փնտրելու, ստանալու եւ տարածելու ազատությունը»:

Կառավարության գործունեության մասին օրենքից էլ հիշեցրել է․ «Հոդված 11. Կառավարության որոշումները 1. Օրենսդրական նախաձեռնությամբ հանդես գալու վերաբերյալ որոշումները եւ Կառավարության ենթաօրենսդրական նորմատիվ իրավական ակտերն ընդունվում են Կառավարության անդամների ընդհանուր թվի ձայների մեծամասնությամբ՝ բանավոր քվեարկությամբ: Կառավարության այլ որոշումներն ընդունվում են նիստին մասնակցող Կառավարության անդամների ձայների մեծամասնությամբ՝ բանավոր քվեարկությամբ: Նիստին մասնակցող Կառավարության անդամները պարտավոր են մասնակցել քվեարկությանը: Կառավարության անդամները քվեարկում են կողմ կամ դեմ: Ձայների հավասարության դեպքում վարչապետի ձայնը որոշիչ է»:

Նիկոլ Փաշինյանի՝ «Կառավարությունում չի կարող որեւէ մեկն իմ դիրքորոշմանը հակասող դիրքորոշում ունենալ» հայտարարությունը, ըստ Զուրաբյանի, իր մեջ պարունակում է Քրեական օրենսգրքի 441 հոդվածով նախատեսված արարքի հատկանիշներ, համաձայն որի՝ «Պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը 1. Պաշտոնատար անձի կողմից իր իշխանական կամ ծառայողական լիազորությունները կամ դրանցով պայմանավորված ազդեցությունն ի վնաս պետական կամ ծառայողական շահերի օգտագործելը կամ իր ծառայողական պարտականությունը չկատարելը, կամ ոչ պատշաճ կատարելը, կամ այնպիսի արարք կատարելը, որը չի բխում իր լիազորություններից կամ դուրս է իր լիազորությունների շրջանակից, որն էական վնաս է պատճառել անձի կամ կազմակերպության իրավունքներին, ազատություններին կամ օրինական շահերին կամ հասարակության, կամ պետության օրինական շահերին, պատժվում է տուգանքով՝ քսանապատիկից քառասնապատիկի չափով, կամ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելով` երեքից յոթ տարի ժամկետով, կամ ազատության սահմանափակմամբ` մեկից երեք տարի ժամկետով, կամ կարճաժամկետ ազատազրկմամբ` մեկից երկու ամիս ժամկետով, կամ ազատազրկմամբ` մեկից չորս տարի ժամկետով: 2. Սույն հոդվածի 1-ին մասով նախատեսված արարքը, որը` 1) կատարվել է բռնություն գործադրելով կամ բռնություն գործադրելու սպառնալիքով…»: