Նիկոլ Փաշինյանն ապացուցեց՝ մենք ճիշտ էինք, Լիպարիտ Դրմեյանը՝ սխալ 168.am

Եվ այսպես, մեկ ոչ լրիվ օր սպասելուց և համոզվելուց հետո, որ այո՛, Միջազգային իրավական հարցերով ներկայացուցչի ղեկավարի պարտականությունները Եղիշե Կիրակոսյանից հետո կատարող Լիպարիտ Դրմեյանն իսկապես ասել է, որ Միջազգային արբիտրաժի որոշումներն անհապաղ ու պարտադիր կատարման ենթակա են, Նիկոլ Փաշինյանը նրան ազատեց աշխատանքից, ինչպես երեկ խոստացել էր:

Կառավարությունը ես եմ, ոչ մեկը չի կարող իմ դիրքորոշմանը հակասող դիրքորոշում ունենա, եթե կան այդպիսիք, թող դիմում գրեն, կամ ես նրանց կհանեմ։

Այսպես պատասխանեց Փաշինյանը հարցին, թե կառավարությունը (Միջազգային իրավական հարցերով ՀՀ ներկայացուցիչը։-Գ.Ս.) ընդունել է, որ ՀԷՑ-ի թեմայով Ստոկհոլմի արբիտրաժը ենթակա է պարտադիր կատարման։ Նա այս հարցից հունից դուրս եկավ ու պնդեց, որ կառավարությունը հենց ինքն է։

«Արբիտրաժում մենք հաղթել ենք և մեր դիրքորոշումները պնդել ենք. Էդքան բան»,- «Արբիտրաժն ո՞ւմ շունն է, որ մենք նրա որոշումները կատարենք» տրամաբանության մեջ թեման փակեց Փաշինյանը:

Լիպարիտ Դրմեյանը, հիշեցնենք, այդպես էր պատասխանել, երբ սույն թվականի օգոստոսի 6-ին Հանրային ծառայությունները կարգավորող հանձնաժողովի՝ ՀԾԿՀ նախագահ Մեսրոպ Մեսրոպյանը նամակ էր գրել Նիկոլ Փաշինյանի աշխատակազմի ղեկավար Արայիկ Հարությունյանին՝ մեջբերելով «Հայաստանի էլեկտրական ցանցեր» ՓԲԸ բաժնետեր հանդիսացող «Տաշիր կապիտալ» ՓԲԸ գլխավոր տնօրեն Նարեկ Կարապետյանի գրությունն՝ ուղղված իրենց, որով ակնկալում են անհապաղ կատարել Ստոկհոլմի արբիտրաժի վճիռը։ ՀԾԿՀ-ն Արայիկ Հարությունյանից այս նամակով ակնկալում է կառավարության դիրքորոշումը՝ կապված Ստոկհոլմի արբիտրաժի կայացրած վճռի և Նարեկ Կարապետյանի պահանջի հետ։

Ի պատասխան ՀԾԿՀ նախագահ Մեսրոպ Մեսրոպյանի գրության՝ կառավարության անունից ՀՀ միջազգային արբիտրաժներում և օտարերկրյա դատարաններում ՀՀ շահերի պաշտպանության վարչության պետ Լիպարիտ Դրմեյանը պատասխանել է, որ արբիտրաժային վճիռը կողմերի կողմից ենթակա է անհապաղ պարտադիր կատարման։

Դեռևս կես տարի առաջ, երբ Եղիշե Կիրակոսյանն աշխատանքից ազատման դիմում գրեց, կամ նրան հեռացրեցին, 168.am-ն առաջինը գրեց այդ մասին՝ նշելով, որ մեր տեղեկություններով՝ Կիրակոսյանի հետ միասին մեծ թվով աշխատակիցներ ևս հեռացել են, իսկ Լիպարիտ Դրմեյանը մնացել է, քանի որ հույս ունի զբաղեցնել գրասենյակի ղեկավարի պաշտոնը:

Լիպարիտ Դրմեյանը վիրավորվել էր մեր գրածից, ու հիմա այդ վեճը դատական լուծման փուլում է: Բայց ժամանակը ցույց տվեց, որ մենք ճիշտ էինք, Դրմեյանը՝ սխալ, որովհետև ինքն աշխատեց ճիշտ այնքան, որքան իր տեսակետները համահունչ էին Նիկոլ Փաշինյանի տեսակետների հետ, և հենց Դրմեյանը ցույց տվեց, որ ինքն իրավաբան է, իսկ ճիշտը մեկն է, ու իրեն սովորեցրել են, որ Արբիտրաժի որոշումները պարտադիր կատարման ենթակա են, ազատվեց աշխատանքից:

Այնպես որ, Նիկոլ Փաշինյանն անկեղծ է, երբ ասում է՝ «Կառավարությունը ես եմ», ու բոլորը պետք է հպատակվեն իր կամքին: Ընտրության խնդիր է. համաձայն չեք ազգակործան ու պետականակործան որոշումների հետ, հեռացե՛ք, կամ մնացե՛ք ու ասե՛ք՝ «Դե, տուն ենք պահում»:

Հ. Գ. Ի դեպ, այսօր հայտնի դարձավ նաև, որ Դրմեյանից հետո աշխատանքից ազատվել է նաև Գրասենյակի խոսնակը՝ Հասմիկ Սամվելյանը՝ սեփական դիմումի համաձայն: