Փաշինյանը հերթական անգամ փայլել է «ճիշտ» ձեւակերպմամբ. Ստյոպա Սաֆարյան aravot.am

«Կառավարությունը ես եմ, չի կարող որևէ մեկն իմ դիրքորոշմանը հակասող դիրքորոշում ունենալ». Նիկոլ Փաշինյանի այս աղմկահարույց հայտարարությունը, ըստ Ստյոպա Սաֆարյանի, որեւէ հակասություն չունի Սահմանադրությանը, եթե նույնիսկ մեր ականջները ցնցում է:

«Ես իր փոխարեն կասեի՝ իշխանությունը ես եմ, կամ ես եմ այսօր ժողովրդի իշխանության իրականացնողը, բայց խոշոր առումով ներկայացուցչական ժողովրդավարության առումով ոչ մի հակասություն չեմ տեսնում ժողովրդավարությանը: Շատերը մեկնաբանում են ավտորիտար է կամ զուգահեռներ են տանում Լյուդովիկոսի արտահայտության հետ՝ պետությունը ես եմ: Ինքը նկատի ունի, որ ժողովրդից մանդատը ես եմ ստացել, ուղղակի հերթական անգամ փայլել է, մեղմ ասած, «ճիշտ» ձեւակերպմամբ»,- Aravot.am-ին ասաց Միջազգային և անվտանգության հարցերի հայկական ինստիտուտ հ/կ ղեկավար Ստյոպա Սաֆարյանը:

Անդրադառնալով Միջազգային իրավական հարցերով ներկայացուցչի գրասենյակի ղեկավար Լիպարիտ Դրմեյանին աշխատանքից ազատելու վերաբերյալ Նիկոլ Փաշինյանի որոշմանը՝ պարոն Սաֆարյանը շարունակեց. «Եկեք տարանջատենք ՝ խոսքի ազատության սահմանները որոնք են: Մենք կարող ենք չհամաձայնել Նիկոլ Փաշինյանի՝ «կառավարությունը ես եմ» բացարձականացնող ձեւակերպման հետ, իրականում իշխանությունն է ինքը՝ ժողովրդից պատվիրակված իշխանությունն ինքն է, կառավարությունը ձեւավորողն է: Չի կարող ենթական, այն էլ առաջնային մանդատ ունեցող իշխանության ենթական, դեմ գործել ղեկավարին: Եկեք հասկանանք՝ բարոյապես էլ ճիշտ չէ, որ եթե չես կիսում այդ իշխանության տեսակետները, բայց ուզում ես աշխատել ու ուզում ես պարտադրել մանդատը կրողին անել այն, ինչ ինքը չի ուզում անել:

Հետեւաբար, ազնիվ է ու ճիշտ հանգուցալուծում, որ Դրմեյանը ազատվել է աշխատանքից; Բյուրոկրատիան՝ քաղաքացիական ծառայության շերտը աշխարհի ոչ մի երկրում նրա համար չէ, որ քաղծառայողն ինչ ուզենա՝ խոսքի ազատության շրջանակներում տեղավորի ու դեմ գնա պետական գծին: Մենք կարող ենք չհամաձայնել Փաշինյանի այդ ձեւակերպման հետ ու կարող ենք վիճել արբիտրաժային դատարանի վերաբերյալ նրա ասածի հետ, բայց միեւնույնն է՝ տվյալ պարագայում չի կարող պետական համակարգում որեւէ մեկը որպես վարձու աշխատող պարտադրել կառավարությանը գործել այնպես, ինչպես ինքն է պատկերացնում»:

Հիշեցնենք, որ Դրմեյանի պաշտոնանկությանը նախորդել էր գրասենյակի տարածած փաստաթուղթը, ըստ որի՝ Լիպարիտ Դրմեյանը դիմել է ՀԾԿՀ նախագահին՝ նշելով, թե Ստոկհոլմյան հրատապ արբիտրաժի որոշումը` ՀԷՑ-ում ժամանակավոր կառավարիչ նշանակելու վերաբերյալ, անհրաժեշտ է անհապաղ կասեցնել՝ Հայաստանի նկատմամբ պատժամիջոցներից խուսափելու համար։

Արփինե ՍԻՄՈՆՅԱՆ