«Փաշինյանը դեռ 20 տարի առաջ էր անիծում մեր հերոսական անցյալը». Կարեն Իգիթյան 168.am

Կովկասագետ Կարեն Իգիթյանը Հայաստան իր մուտքի արգելքի վերաբերյալ որևէ նորություն չունի: «Փաստաբանները զբաղվում են այդ հարցով: Այս պահին ԱԱԾ-ից ես պատասխան չունեմ, բայց պատգամավորներից մեկն ասել է, որ այսպիսի ձևակերպում են տվել՝ ազգային անվտանգությանը և հասարակական առողջությանը սպառնալիք ներկայացնելու համար»,- 168TV-ի «Ռեվյու» հաղորդման ընթացքում ասաց նա:

Անդրադառնալով Հայաստանում առկա իրավիճակին, նա նկատեց, որ ամեն անգամ, երբ Փաշինյանն ասում է՝ նոր Հայաստան, պետք է սպասել նոր կորուստներ. «2018-ին նոր Հայաստան էր հռչակվել, եղավ պատերազմը, հետո՝ խաղաղության դարաշրջան, որն ավարտվեց մի քանի պատերազմով, հիմա՝ նոր Հայաստանի նոր խաղաղություն: Այս տենդենցը մեզ ցույց է տալիս, որ ևս մեկ անգամ կորուստներ ենք ունենալու: Ցավոք, Իլհամ Ալիևը հստակ ասել է, որ, այսպես կոչված, խաղաղության փաստաթուղթը եղել է Ադրբեջանի թելադրանքով: Մենք կարող ենք նայել, թե ինչ են կողմերը խոսել մինչ այդ և ինչ է տեղ գտել փաստաթղթում…»:

Նիկոլ Փաշինյանը հայտարարել է, թե կառավարությունն ինքն է, և եթե կա մեկը, ով իր դիրքորոշմանը հակասող դիրքորոշում ունի, թող դիմումը գրի: Կարեն Իգիթյանի դիտարկմամբ՝ պետության, դեմոկրատիայի մասին գործող իշխանությունների պատկերացումը հենց դա է. «Փաշինյանն ասում է՝ ինձ ժողովուրդն ընտրել է, այսինքն՝ դրանով մերժել է Վեհափառին: Դա կեղծ տրամաբանություն է և սուտ. Մի քանի կեղծիք կա այդտեղ: Նախ՝ արդյո՞ք ժողովուրդն ընտրել է Փաշինյանին. ընտրացուցակում գրանցված քաղաքացիներից 26 տոկոսն է իրեն ընտրել: Փաշինյանի պատերացմամբ՝ դեմոկրատիան այն է, որ ժողովուրդը եթե մեկին ընտրում է, այդ մեկն ինչ ուզում՝ անում է, ինչ ուզում՝ բանակցում է: Բայց դա հեռու է ժողովրդավարության սահմանումից:

Սա դեմոկրատների բռնապետություն է: Երբ իրեն ձեռք է տալիս, ասում է՝ հո անձա՞մբ չի անում որևէ բան, անում է՝ որպես վարչապետ: Ուզում է Վեհափառին հեռացնել և դա անում է՝ որպես վարչապետ, բայց ասում է, որ դա անում է՝ որպես Առաքելական եկեղեցու շարքային հետևորդ: Հայ Առաքելական եկեղեցու հետևորդը նման իրավունք չունի, վարչապետը նման իրավունք չունի:

Ստացվում է, որ ինքը սա անում է ո՛չ որպես ՀՀ վարչապետ, ո՛չ որպես Հայ Առաքելական եկեղեցու հետևորդ: Նա այդպես է անում, որովհետև Հայ Առաքելական եկեղեցին և անձամբ Վեհափառը չեն ենթարկվում իրեն, առաջ են տանում հայկական ազգային շահերը, չեն ուրանում մեր պատմությունը՝ ի տարբերություն Փաշինյանի, որը դեռ 20 տարի առաջ գրել էր հոդված, որտեղ անիծում էր մեր հերոսական անցյալը: Փաշինյանն ատում է պատմական Հայաստանը, հայերի հերոսական անցյալը: Ինչ ինքը հիմա ասում և անում է, անում էր նաև 20 տարի առաջ: 2018-ից մի քանի տարի առաջ փոխեցին քարոզչությունը, որովհետև հասկացան, որ հայ ժողովուրդը չի ընդունում: 2008-ին երբ Փաշինյանը սա ասում էր, մարդիկ իրենց չընտրեցին: Իրենք դա հասկացան և փոխեցին քարոզչությունը, բայց իրենց պատկերացումները նույնն են, ինչ 20 տարի առաջ»:

Նա նկատեց՝ Ադրբեջանի նպատակը, ի վերջո, Երևանն է, ինչը պարզ ցույց է տալիս, իսկ Փաշինյանն ասում է՝ ուշադրություն մի դարձրեք, խաղաղություն է. «Հենց դրա համար էլ Ադրբեջանը պահանջում է Եկեղեցու դեմ այս ամենը, Փաշազադեի հայտարարություններից հետո Հայաստանում սկսվեց եկեղեցու դեմ արշավը»:

Կարեն Իգիթյանն անդրադարձավ նաև Փաշինյանի կողմից Բայդենի վարչակազմին ուղղված մեղադրանքներին՝ նկատելով, որ փաստորեն ԱՄՆ-ի նախկիններն էլ են մեղավոր.

«Հետաքրքիր է, որ հենց այդ վարչակազմի հետ էր ինքը ռազմավարական գործընկերության հռչակագիր ստորագրում: Փաշինյանի համար միշտ ինչ-որ մեկը մեղավոր է և այդ ինչ-որ մեկն ինքը չէ: Եթե այսպիսի հնարավորություն կա Թրամփի համար հաճելի բան ասել, առանց նայելու՝ դա ճիշտ է, սուտ է, այդ մարդու պաշտոնավարման ժամանակ ինչ ես խոսել, առանց փաստերի… Տեսեք՝ 2018-ին, երբ Հայաստանում եղավ հեղաշրջում, Թրամփն էր իշխանության: 44-օրյա պատերազմի ժամանակ Թրամփն էր իշխանության, և ըստ Փաշինյանի՝ Հայաստանն այդ ժամանակ խոցելի չէր: Բայց պարզվում է, որ Բայդենի օրոք Հայաստանն ահավոր խոցելի է եղել: Բայդենի օրոք դա այն մի քանի տարին է, երբ Փաշինյանն էր Հայաստանի ղեկավարը: Գուցե ճիշտ է այսպես ասել, որ՝ Փաշինյանի օրոք Հայաստանն ամենախոցելին է եղել»:

Մանրամասները՝ 168TV-ի տեսանյութում