«Սա թատրոն է, որը խաղում են Իսրայելն ու Թուրքիան. Իսրայելը չի ճանաչել Հայոց ցեղասպանությունը». Տիրան Լոքմագոզյան 168.am

Թուրքիայից երեկվանից արձագանքում է Իսրայելի վարչապետ Բենիամին Նեթանյահուի՝ Հայոց ցեղասպանության վերաբերյալ արած հայտարարություններին։ Նա օրերս հայտարարել էր, որ Իսրայելը ճանաչել է Հայոց ցեղասպանությունը։

Թուրքիայի փոխնախարար Ջևդեթ Յըլմազն արձագանքել է այս հայտարարությանը՝ նշելով, որ Նեթանյահուն իրականում պետք է պատասխան տա Գազայում իրականացվող «բացահայտ ցեղասպանության» համար։

Թուրքագետ Տիրան Լոքմագոզյանից հետաքրքրվեցին՝ ինչո՞ւ հենց այս փուլում Իսրայելի վարչապետը նման հայտարարություն արեց, այն ո՞ւմ էր ուղղված։

Նրա խոսքով՝ Իսրայելի վարչապետի այս հայտարարությունն ընդհանրապես լուրջ չէ, որովհետև Իսրայելը չի՛ ճանաչել Հայոց ցեղասպանությունը։

«Իսրայելի վարչապետը հստակ չի ասում, միայն ասում է, թե՝ «ես կարծում եմ՝ Քնեսեթն ընդունել է» և այլն, բայց Քնեսեթն այդպիսի բան չի ընդունել։ Հակառակը, մի քանի անգամ երբ Իսրայել-Թուրքիա հարաբերությունները վատացել են, ինչպես Միացյալ Նահանգներն էր նախկինում անում, մեջտեղ են բերել այդ հարցը, կամ հարցը Քնեսեթ երբեք էլ չի մտել։ Երբ Նեթանյահուին լրագրողը հարցնում է՝ «հիմա ի՞նչ, ընդունում է, նա պատասխանում է, որ «փաստորեն՝ այո»։

Բայց ո՛չ նրա կողմից, ո՛չ Քնեսեթի կողմից Իսրայելը Հայոց ցեղասպանությունը չի ընդունել և չի էլ ընդունելու»,- 168.am-ի հետ զրույցում ասաց Տիրան Լոքմագոզյանը։

Մեր զրուցակիցն ընդգծեց՝ Թուրքիա-Իսրայել հարաբերությունները միայն արտաքուստ են վատ, իրականում այդ երկու երկրների հարաբերությունները շատ լավն են, հատկապես տնտեսական առումով և այդ պահին իրենց գագաթնակետում են, երբեք այսքան լավը չեն եղել։

«Թուրքիան այս ամենից հետո այնպես ներկայացրեց, որ այլևս Իսրայելին ապրանք չի մատակարարի։ Ճիշտ հակառակն է, և Իսրայելի անվան տակ չեն գնում ապրանքները, այլ Պաղեստինի անվան տակ են գնում։ Բայց Պաղեստինն այդ ապրանքների կարիքը ո՛չ ունի, ո՛չ էլ կարող է այս իրավիճակում դրանք որևէ բան անել։ Այս ապրանքները Պաղեստինի անվան տակ գնում են Իսրայել։ Եթե Թուրքիան ցանկանար որևէ լուրջ քայլ կատարել, ապա էներգակիրների ճանապարհն ուղղակի կփակեր, Ադրբեջանից Իսրայելին մատակարարվող գազն իր հողով է անցնում։ Բայց Թուրքիան նման քայլի չի դիմում»,- հավելեց թուրքագետը։

Մեր զրուցակիցն ընդգծեց՝ երկար ժամանակ Թուրքիան իրեն ներկայացնում է՝ որպես մուսուլմանների, արաբական աշխարհի պաշտպան։

«Իսրայել պետությունն առաջինը ճանաչել է Թուրքիան, Թուրքիան էլ առաջին մուսուլման երկիրն է եղել, որը ճանաչել է Իսրայելը։ Չեմ կարծում, որ այս առումով որևէ շեղում լինի։ Սա ուղղակի թատրոն է, որը երկու երկրները խաղում են։ Միջազգային քաղաքականության մեջ շատ մեծ փոփոխություն պետք է լինի, որ նրանց միջև որևէ խնդիր ծագի։ Կան նաև այլ գործոններ, որոնց պատճառով այս երկու երկրները միմյանց դեմ չեն կանգնելու»,- ընդգծեց թուրքագետը։