ՏԵՍԱՆՅՈՒԹ․ Կարապետյանները տվեցին 2026 թվականի ընտրությունների մեկնարկը. ինչ պլան ունեն armlur.am

Նիկոլ Փաշինյանի քաղաքական թիմին «Տաշիր գրուպ» ընկերությունների խմբի փոխնախագահ Նարեկ Կարապետյանն այսօր հրավիրված ասուլիսում անակնկալ մատուցեց՝ ասելով, որ 2026-ի ընտրություններին Սամվել Կարապետյանը կմասնակցի նոր քաղաքական ուժով։

Կալանավորված գործարար Սամվել Կարապետյանի եղբորորդին` Նարեկ Կարապետյանը այսօր հայտարարեց «Մեր ձևով» կամավորական շարժման ստեղծման մասին, որը կհամակարգի ինքը։

Եթե հետևենք Կարապետյանի խոսքերին, կնկատենք որ շարժումը սկզբում ապաքաղաքական էր, հետո կտրուկ դարձավ քաղաքական ու հայտնվեց 2026 թվականի խորհրդարանական ընտրություններում հայտ ներկայացնող կուսակցությունների ցանկում։

Շարժման շրջանակում ստեղծվելու են հինգ հիմնական աշխատանքային խմբեր։ Նրանցից առաջինը, ըստ Կարապետյանի, կրելու է «նոր տնտեսություն, աշխատանք բոլորի համար, բարեկեցություն բոլորի համար» անունը։

Կամավորական շարժումն ընդգրկող խմբերը համակարգելու են մի շարք ոլորտներ՝ գյուղատնտեսություն, զբոստաշրջություն, IT-ի, արտաքին հարաբերություններ։

Միլիարդատեր գործարարի եղբորորդին նաև բացատրել է «մեր ձևով» արտահայտության իմաստը։

««Մեր ձևով» նշանակում է՝ հայավարի, այսինքն՝ պատվով, աշխատասիրությամբ և խելքով։ «Մեր ձևով» նշանակում է՝ արժանապատվությամբ, այսինքն՝ հանուն մեր երեխաների իրական ու բարեկեցիկ ապագայի, ու մենք ինչ անենք, անելու ենք մեր ձևով»,- նշել է Կարապետյանը։

Նարեկ կարապետյանը թեպետք նոր ձևավորվող քաղաքական թիմի անդամների անուններ չտվեց, սակայն ազդակներ եղան համագործակցության վերաբերյալ։

Հարցին, թե արդյոք կլինե՞ն նախկին իշխանություններից մարդիկ նոր փաթեթավորմամբ Կարապետյանը չշտապեց տալ բացասական պատասխան․

«Կստեղծվի սկզբունքորեն նոր քաղաքական ուժ, ինչպես հայտարարել է Սամվել Կարապետյանը։ Մենք ունենք մեր հայացքները։ Եթե քաղաքական դաշտում լիներ որևէ ուժ, որը կարտացոլեր մեր գաղափարները, ապա հնարավոր է՝ ուշադրություն դարձնեինք այդ ուժին»,– ասուլիսի ժամանակ ասաց Նարեկ Կարապետյանը։

Հիշեցնենք, որ օգոստոսի 15-ին Սամվել Կարապետյանի կալանքի ժամկետը երկարաձգվեց 2 ամսով։ Նա մեղադրվում է իշխանությունը զավթելու, սահմանադրական կարգը բռնի տապալելու հրապարակային կոչ հնչեցնելու համար։ Սամվել Կարապետյանը մեղադրանքը չի ընդունում, նրա պաշտպանական խումբը պնդում է, որ առաջադրված մեղադրանքն անհիմն է:

Էմմա Միքայելյան

Մանրամասները՝ տեսանյութում․