Տրանսպորտային ներկայիս համակարգը պարզապես թյուրիմացություն է, չի աշխատում. Հայաստանում ամեն ինչ վերջից են սկսում. Կարեն Չիլինգարյան  168.am

Օգոստոսի 1-ից, ինչպես Երևանի քաղաքապետ Տիգրան Ավինյանն էր հայտարարել, հանրային տրանսպորտում մեկնարկել է այն քաղաքացիներին տուգանելու գործընթացը, որոնք օգտվում են ուրիշի տրանսպորտային քարտից կամ հրաժարվում են վճարում կատարել։ Արդեն մի քանի օր է՝ Քաղաքապետարանի աշխատակիցները մտնում են հանրային տրանսպորտ ու «ստուգում» քաղաքացիներին, ինչն էլ հանրային տրանսպորտով երթևեկող քաղաքացիների համար դարձել է մեծ գլխացավանք։

Սրան զուգահեռ՝ 3 օր անց մեկնարկելու է նոր ուսումնական տարին, ինչը նշանակում է, որ հանրային տրանսպորտն աշխատելու է ավելի ծանրաբեռնված, արդյո՞ք քաղաքացիներին տուգանելու փոխարեն՝ քաղաքային իշխանությունները չպետք է մտածեին, թե ինչ է պետք անել, որպեսզի առավոտյան մարդիկ կարողանան հանգիստ հասնել ուսումնական հաստատություններ, աշխատավայր։

«Սպառողների խորհրդատվության կենտրոն» ՀԿ նախագահ Կարեն Չիլինգարյանը ցավով է արձանագրում, որ հանրային տրանսպորտի ուղեվարձը բարձրացրեցին, սակայն նորմալ տրանսպորտային համակարգ չներդրեցին, որպեսզի քաղաքացին կարողանա հանգիստ երթևեկել։

«Քաղաքացիներին տուգանելու այդ գործընթացը համարենք, որ նորմալ է, եթե ուրիշի քարտն ես օգտագործում, օրինակ, թոշակառուների։ Բայց այստեղ կան այլ խնդիրներ, որովհետև Հայաստանում ամեն ինչ վերջից են սկսում, փոխանակ համակարգը կարգավորեին, հետո սկսեին այդ գործընթացը, քանի որ տրանսպորտային ներկայիս համակարգը պարզապես թյուրիմացություն է… Սկզբում իրենց դրած այդ համակարգերը լավ չէին աշխատում, չնայած հիմա էլ, որովհետև մարդիկ բարձրանում են տրանսպորտ, իրենց քարտը մի քանի անգամ մոտեցնում են վալիդատորին, բայց համակարգը չի աշխատում, չի կարդում քարտը։ Պիկ ժամերին մարդիկ ժամերով սպասում են, որ այդ համակարգն աշխատի, այս հարցն էր պետք սկզբում լուծել, նման բան այլ երկրներում ես չեմ տեսել։ Այլ երկրներում քարտը մոտեցնում ու անցնում ես, մեզ մոտ ժամերով պետք է պահես»,- 168.am-ի հետ զրույցում նշեց Կարեն Չիլինգարյանը։

Մեր զրուցակիցը նաև հիշեցրեց, որ քաղաքային իշխանությունները խոստանում էին, թե քաղաքացին մեկ անգամ վճարելով՝ կարող է 90 րոպե երթևեկել մի քանի տրանսպորտներով՝ մի վայրից հասնելով մեկ այլ վայր։ Այդ համակարգը չներդրեցին, փոխարենը՝ հանրային տրանսպորտ տարան տուգանող անձանց։

«Պատկերացրեք, քաղաքացին բարձրանում է տրանսպորտ, քարտը մոտեցնում է վալիդատորին, բայց սարքը չի կարդում, այդ քաղաքացին էլ գնում նստում է, ու գալիս են հսկիչներն ու տուգանում քաղաքացուն, հիմա այս իրավիճակում քաղաքացին մեղավո՞ր է։ Կրկնում եմ՝ իրենց ներդրած համակարգը լավ չի աշխատում, այս խնդիրն առաջինը պետք է լուծեն։

Ինքս հանրային տրանսպորտից հաճախակի եմ օգտվում, հատկապես՝ Կենտրոն գնալու համար, որովհետև մեքենայի կայանման խնդիր միշտ կա։ Քաղաքային իշխանությունները կայանման ժամավճարը դարձրեցին 300 դրամ, բայց մեկ է՝ նորից չի աշխատում, մեքենան կայանելու տեղ չկա Կենտրոնում»,- շեշտեց մեր զրուցակիցը։

Կարեն Չիլինգարյանը վստահեցնում է՝ սեպտեմբերի 1-ին հանրային տրանսպորտը պատրաստ չի լինելու, քանի որ ներդրված տրանսպորտային համակարգը պատրաստ չէ ծանրաբեռնված աշխատելու։

«Չգիտեմ՝ ինչ մասնագետների խումբ է այնտեղ նստած, որ այս հարցը չեն կարողանում լուծել, կամ էլ չեն ուզում լուծել։ Դեմ չեմ, թող բարձրացնեն ուղեվարձը, բայց ապահովեն արժանապատիվ երթևեկություն մեր քաղաքացիների համար։ Եթե տրանսպորտային համակարգը լավ աշխատեր, գրաֆիկով աշխատեին, քաղաքացիները երկար չէին սպասի, իսկ այս պարագայում ուշացումով են աշխատում ու մարդիկ մի կերպ են տեղավորվում տրանսպորտում»,- ընդգծեց Կարեն Չիլինգարյանը։