Ռուսաստանը «կստվերի՞» Վաշինգտոնի հայ-ադրբեջանական «համաձայնությունները» 1in.am

Շանհայի համագործակցության կազմակերպության գագաթաժողովի շրջանակներում Վլադիմիր Պուտին-Իլհամ Ալիև «աշխատանքային հանդիպում դեռևս համաձայնեցված չէ»: Այդ մասին ասել է ՌԴ նախագահի մամուլի քարտուղար Դմիտրի Պեսկովը, հաղորդում է ՏԱՍՍ-ը: «Ալ-Արաբիա»-ին հարցազրույցում Իլհամ Ալիևը կրկին անդրադարձել է Բաքու-Գրոզնի չվերթի օդանավի խորտակման համար Ռուսաստանի պատասխանատվությանը: Նա ասել է, որ հարաբերությունների կարգավորման կողմնակից է, բայց երբեք «չի հանդուրժի ագրեսիա և անհարգալի վերաբերմունք»:

Նույն տեղում նա խոսել է Ադրբեջանի տարածքով Ռուսաստանին Իրանի հետ հաղորդակցության հնարավորության մասին, այդ թվում՝ «Թրամփի կամուրջ» նախագծի իրականացման շրջանակներում: Ալիևը, սակայն, նախագահի պաշտոնն ստանձնելուց ի վեր առաջին անգամ թույլ է տվել բացել Ադրբեջանի սահմանադրության նախաբանի «գաղտնագրումը» և բոլշևիկյան Ռուսաստանին և Խորհրդային Միությանն անվանել է «օկուպանտ»:

Ռուսաստանի պաշտոնական ոչ մի կառույց Ալիևի այդ հայտարարություններին չի անդրադարձել: Մոսկվայում, երևում է, նախընտրում են ոչ հրապարակային դիվանագիտությունը: Այս առումով խիստ ուշագրավ է Բաքվի իշխանական լրատվամիջոցներից մեկի հրապարակումը, որտեղ կասկած է հայտնվում, թե Մոսկվան կարող է ԵԱՀԿ ՄԽ լուծարման հարցում «վետո կիրառել»:

Մինսկի խմբի անարդյունավետության մասին ալիևյան քարոզչության առաջին և միակ աջակիցը Մոսկվան էր, և նրա սաբոտաժի հետևանքով է, որ քառասունչորսօրյա պատերազմից հետո Մինսկի խմբի համանախագահների հանդիպումը տապալվել է:

Բայց դա բոլորովին այլ՝ ռուս-ադրբեջանական «մեղրամիսի» ժամանակաշրջան էր, երբ Ռուսաստանը հույս ուներ ոչ միայն ԼՂ-ում ռազմական ներկայություն պահպանել, այլև Ադրբեջանին «գայթակղել» ՀԱՊԿ-ի և ԵԱՏՄ-ի անդամակցության:

Այսօր գետնի վրա իրավիճակ է, երբ Միացյալ Նահանգները «մտել են» Հարավային Կովկաս: Հայ-ադրբեջանական վերջնական կարգավորումը միայն կամրապնդրի ԱՄՆ-ի տարածաշրջնային ազդեցությունը, ինչը, բնականաբար, ենթադրում է Ռուսաստանի դիրքերի թուլացում: Մոսկվան, ինչ խոսք, Մինսկի խմբի պահպանմամբ շահագրգռված չէ, բայց Վաշինգտոնի նախնական պայմանավորվածությունների վրա «ստվեր թողնելու» մոտիվացիայով կարող է «վետո» կիրառել: Եթե, իհարկե, ՇՀԿ գագաթաժողովի շրջանակներում Պուտին-Ալիև հանդիպումն ավարտվի ապարդյուն կամ առհասարակ չկայանա: