Սիրելու ու խոնարհվելու փաշինյանական ձև․ նվազել է միջին կենսաթոշակի ու նպաստի չափը 168.am

Նիկոլ Փաշինյանը, որը թոշակների բարձրացումը սովորաբար հաշվում է ոչ թե բարձրացման չափով, այլ բարձրացումների քանակով, տարեսկզբին հոխորտում էր, թե երբեք Հայաստանում այսքան թոշակ չի բարձրացվել։

«Հետո էլ ասում են՝ թոշակ չի բարձրացել։ Յոթ տարում 5 անգամ թոշակ բարձրացնենք, կասեն՝ թոշակը չեն բարձրացրել»,- անդրադառնալով թոշակների չբարձրացման վերաբերյալ հասարակության շրջանում առկա դժգոհություններին՝ արդարանում էր Նիկոլ Փաշինյանը։

Թե ինչքանո՞վ են թոշակները Հայաստանում բարձրացել ու բարձրանում, տեսնում ենք պաշտոնական ցուցանիշներում, որոնք հրապարակում է Նիկոլ Փաշինյանի կառավարության «ձեռքբերումներն» ու տնտեսական «աննախադեպ հաջողություններն» ամրագրող վիճակագրական ծառայությունը։

Պաշտոնական վիճակագրությունն է արձանագրել, որ վերջին 1 տարում միջին կենսաթոշակը Հայաստանում ոչ միայն ոչ մի լումայով չի ավելացել, այլև նվազել է։

Անցած տարվա հուլիսի 1-ին միջին կենսաթոշակը 49 հազար 171 դրամ էր, այս տարվա հուլիսի 1-ին դարձել է 49 հազար 32 դրամ. 139 դրամով նույնիսկ նվազել է։

Այս տարվա հուլիսի 1-ին միջին կենսաթոշակն ավելի ցածր է եղել նաև 2023թ. վերջի համեմատ։

Կրկին պաշտոնական վիճակագրության համաձայն, այն ժամանակ միջին կենսաթոշակը գերազանցում էր 49 հազար 132 դրամը, այս տարվա հուլիսի 1-ին կազմել է 49 հազար 32 դրամ։

Հայաստանում համատարած ամեն ինչ թանկացել է, իսկ միջին կենսաթոշակը նվազել է։ Անգամ, եթե վերցնենք պաշտոնական գնաճը, որը որևէ աղերս չունի գնաճի այն իրական ազդեցության հետ, ինչը քաղաքացիներն, այդ թվում՝ թոշակառուները, զգում են իրենց վրա, բավական է՝ համոզվելու համար, որ այս մարդիկ առնվազն վերջին 1 տարում սկսել են ավելի վատ ապրել, քան ապրում էին մինչ այդ։ Դեռ չենք ասում, որ այլ քաղաքացիների նման, կենսաթոշակառուներն էլ վերջին 1 տարում ավելի շատ գույքահարկ են վճարում, քան վճարում էին նախկինում, ավելի շատ աղբահանության վճար են վճարում, քան վճարում էին նախկինում, ավելի շատ տրանսպորտի վճար են վճարում, քան վճարում էին նախկինում։

Ծախսերի ավելացման այս ցանկն էլի կարելի է շարունակել, բայց դա էլ բավական է համոզվելու համար, որ Նիկոլ Փաշինյանն ու իր կառավարությունը, դատարկ խոսելուց բացի, թոշակառուի կյանքում ոչ մի դրական բան չի փոխել։ Ովքեր տեղյակ են, թե այսօր ինչ է կատարվում սննդամթերքի գների հետ, հավանաբար կհասկանան, թե ինչի մասին է խոսքը։

Երբեք Հայաստանում այս սեզոնին գյուղմթերքներն այնքան թանկ չեն եղել, ինչպես այս տարի։ Խոսքը՝ ինչպես մրգերի, այնպես էլ՝ բանջարեղենի գների մասին է։

Իշխանությունը բռնի զավթելու սկզբնական շրջանում Նիկոլ Փաշինյանը ցուցադրաբար շրջում էր գյուղմթերքների շուկաներում, գներն էր ճշտում։ Թող հիմա էլ դուրս գա ու տեսնի, թե ինչ է կատարվում։

Համատարած ամեն ինչ թանկացել է, երբեմն անգամներով։ Ու եկամուտների ոչ մի լումա ավելացում չունեցող քաղաքացին, այդ թվում՝ թոշակառուն, իր վրա կրում է այդ թանկացման ազդեցությունը։

Վերջին տվյալներով, Հայաստանում 500 հազարից ավելի կենսաթոշակառու կա, որոնց միջին կենսաթոշակն այս տարի ավելի ցածր է, քան անցած տարի էր։

Սա վերաբերում է ոչ միայն կենսաթոշակառուներին, այլև նպաստառուներին։

Հայաստանում նպաստի միջին չափը ևս նվազել է։ Անցած տարվա հուլիսի 1-ին 36 հազար 631 դրամ էր, այս տարվա հուլիսի 1-ին կազմել է 36 հազար 584 դրամ։

Տարբերությունը, ինչպես կենսաթոշակների դեպքում, գուցե մեծ չէ, բայց նվազման փաստը բավական է ասելու, որ Նիկոլ Փաշինյանի իշխանության «համատարած ու աննախադեպ» ձեռքբերումների պայմաններում այս մարդիկ էլ սկսել են ավելի վատ ապրել, քան նախկինում էին ապրում։ Այս դեպքում էլ խոսքը գրեթե 118 հազար քաղաքացիների մասին է, որոնք նպաստառու են։

Նման ընտանիքների քանակը հասնում է գրեթե 55 հազարի։ Նախորդ տարի 65 հազարից անցնում էր։

Կարող է տպավորություն ստեղծվել, թե նպաստառուների մի մասի վիճակը լավացել է ու այլևս նպաստի կարիք չունի։ Բայց իրականությունն այլ է. ավելի քան 10 հազար նպաստառուի հանել են նպաստառուների ցանկից։ Նպաստ ստանալու չափանիշները փոխել են ու հազարավոր ընտանիքների զրկել նպաստից, որը շատ դեպքերում այդ ընտանիքների ապրուստի հիմնական միջոցն է։ Կրճատել են՝ ինչպես ընտանեկան, այնպես էլ՝ սոցիալական նպաստ ստացող ընտանիքների քանակը։

Կենսաթոշակառուների նման, նպաստառուների կյանքում էլ վերջին 1 տարում միայն ծախսերն են ավելացել։

Եվ սա վերաբերում է ընդհանուր առմամբ 618.000 քաղաքացու, որոնց կյանքը, ապրելու պայմանները վատացել են։ Բայց Նիկոլ Փաշինյանը չի դադարում ինքնամոռաց կրկնել, որ մարդիկ սկսել են ավելի լավ ապրել։

Հիմա այս մարդիկ ինչո՞վ են ավելի լավ ապրում։

Այնպես չէ, որ նախկինում կենսաթոշակներն ու նպաստներն այնպիսի առաջանցիկ տեմպերով են բարձրացել, որ փակում են այսօրվա թանկացումների ու այլ ծախսերի ավելացումների ազդեցությունը։

Վերջին անգամ բոլոր կենսաթոշակառուների բազային կենսաթոշակը Հայաստանում բարձրացել է 2022թ. սեպտեմբերին, այն էլ՝ ընդամենը 3 հազար դրամի չափով։ Նախկինում 18 հազար դրամ էր, դարձավ 21 հազար դրամ։

2023թ. կեսերից ևս 1 անգամ կենսաթոշակները բարձրացրին, կրկին 3 հազար դրամով, բայց դա վերաբերում էր միայն նվազագույն կենսաթոշակ ստացողներին, որոնք կազմում էին կենսաթոշակառուների շատ փոքր մասը։

Չորս տարվա ընթացքում սա է եղել կենսաթոշակների ամբողջ բարձրացումը։ Չնայած այդ ընթացքում ապրելը Հայաստանում էապես ծանրացել է ու թանկացել։ Բայց դա, միևնույն է, պատճառ չի եղել, որպեսզի կառավարությունը բարեհաճի ինչ-որ ձևով փոխհատուցել սոցիալական անապահով խավերի կորուստները։

Հետվճարի համակարգ են ներդրել, որից, սակայն, շատերը մինչև հիմա էլ չեն կարողանում օգտվել։ Զարմանալի չէ, որ անգամ պաշտոնական վիճակագրությունն է արձանագրում, որ վերջին 1 տարում՝ ինչպես միջին կենսաթոշակի, այնպես էլ՝ միջին նպաստի չափը նվազել է։

ՀԱԿՈԲ ՔՈՉԱՐՅԱՆ