Իրաքյան «նվեր»՝ Ալիևին 1in.am

«Ֆրանս պրես» գործակալությունը, հղում անելով երկու դիվանագետի, որ չեն ցանկացել բացահայտել իրենց ինքնությունը, հայտնել է, որ Իրաքի կառավարությունը որոշել է ԻԼԻՊ-ի օտարերկրյա անդամներին «արտաքսել իրենց քաղաքացիության երկրներ»: Նրանց ներկայացմամբ, գործընթացը կարող է երկար տևել:

«Ֆրանս պրեսի» տեղեկություններով՝ Իրաքի բանտերում և ճամբարներում պահվող զինառյալների մեջ ամենամեծ թիվ են կազմում Թուրքիայի, Ռուսաստանի և Ադրբեջանի քաղաքացիները: Խոսքը նաև նրանց ընտանիքների անդամների՝ կանանց և երեխաների մասին է:

Իրաքի կառավարությունը ԻԼԻՊ-ի ներկալված զինառյալների և նրանց կանանց ու երեխաների պահպանության ծախսերը հոգում է միջազգային կառույցների աջակցությամբ: Որոշ դեպքերում այդ ճամբարների հսկողություն իրականացնում են «դաշնակից երկրների զինծառայողները»: Վերջերս հայտնի է դարձել, որ Միացյալ Նահանգները պաշտոնական Բաղդադին տեղեկացրել է իր ռազմաբազաների մի մասը դուրս բերելու մասին:

Իրաքի կառավարության գլխավոր մտահոգությունը, սակայն, այն է, որ փակ ճամբարներում պահվող երեխաները «դաստիարակվում են ջիհադականության սկզբունքներով»: Բաղդադը զգուշավորություն ունի, որ հասնելով հասուն տարիքի՝ ԻԼԻՊ-ի զինառյալների զավակները նույնպես ընտրելու են իսլամական ծայրահեղականությունը:

Այդ իսկ պատճառով կառավարությունը մասնավորապես Ադրբեջանի դեպքում խնդրել է, որպեսզի իշխանությունները կազմակերպեն քաղաքացիների հայրենադարձություն: Բաքվի մամուլում երբեմն տեղեկություն է հայտնվում մի քանի կնոջ և նրանց երեխաների Ադրբեջան տեղափոխելու մասին, բայց որքանով հասկացվում է՝ իրաքյան ճամբարներում պահվում են հազարավոր ադրբեջանցիներ:

Եթե «Ֆրանս պրեսի» դիվանագիտական աղբյուրների տեղեկությունը ստույգ է, ապա Ադրբեջանի համար ստեղծվում է շատ բարդ իրավիճակ: Ալիևը չի կարող հրաժարվել իր հազարավոր քաղաքացիներից, մանավանդ որ նրանց մի զգալի մասը կանայք և երեխաներ են, բայց նրանց զանգվածային հայրենադարձությունը խնդրահարույց է այն իմաստով, որ կարող են ջիհադականություն տարածել:

Այդ հարցի շուրջ Ադրբեջանի և Իրաքի պատկան կառույցները մի քանի քննարկումներ են ունեցել: Ըստ որոշ տեղեկությունների, Ալիևը փորձել է նրանց կեցության կարիքները հոգալ Իրաքյան Քրդստանում, բայց Էրբիլի իշխանությունների կողմից բավարար աջակցություն չի ստացել: Ինչպե՞ս կկարգավորվի ադրբեջանցի ԻԼԻՊ-ականների, նրանց կանանց և երեխաների հայրենադարձության հարցը: Ալիևը ձգտում է Մերձավոր Արևելքում քաղաքական հեղինակության հասնել: Իրաքի որոշումն այս առումով ուղղակի «նվեր է» նրան: