Թրամփը Ալիևին նկարներ է ուղարկել կարճ գրությամբ. Ադրբեջանի նախագահը շուտով ճնշումների կենթարկվի. տեսանյութ armtimes.com

ԼՂ ԱԺ նախկին պատգամավոր, հրապարակախոս Վահրամ Աթանեսյանը չի կիսում իշխանության ընդդիմախոսների այն պնդումները, թե Վաշինգտոնում ստորագրված փաստաթղթերով պատերազմի ռիսկը մեծացել է: Ըստ նրա՝ ընդհակառակը՝ սրանով այդ ռիսկերը նվազում են:

Աթանեսյանը, սակայն, դեռ չի պատկերացնում, թե ինչպես է հաղթահարվելու ազգերի միջև փոխադարձ անհանդուրժողականությունը:

«Նոնսենս է, որ ասում են՝ վաշինգտոնյան համաձայնագրից ՀՀ-ն ինչ է ստացել: Ես էլ հակադարձում եմ, ասում՝ իսկ Ալիևն ի՞նչ է ստացել: 17 հոդվածներից յուրաքանչյուրն ի՞նչ է տալիս Ադրբեջանին»,- ասում է նա, ապա նկատում. «Զանգեզուրի միջանցք արտահայտությունը միջազգային խոսույթից դուրս է եկել»:

Միաժամանակ Աթանեսյանը ուշագրավ հանգամանք է մատնանշում. «Թրամփը Ալիևին է ուղարկել Սպիտակ տանը արված լուսանկարները և գրել՝ «դու խիզախ առաջնորդ ես, Իլհա՛մ»: Թրամփը փաստորեն Ալիևին ասում է, որ պայմանավորվածությունից հրաժարվելու տեղ չունի: Ադրբեջանական քարոզչությունը սա ներկայացնում է, թե Ալիևը Հարավային Կովկասի Ռեմբոն է, բայց սա, դիվանագիտական լեզվով ասած, կշտամբանք է»:

Ըստ Աթանեսյանի՝ Հայաստանը պետք է ամեն ինչ անի, որպեսզի պայմանագիրը ստորագրվի մինչև 2026 թվականի ընտրություններ. «Օգոստոսի 31-ին, սեպտեմբերի 1-ին Շանհայի համագործակցության կազմակերպության գագաթնաժողովում Իլհամ Ալիևը կարող է ենթարկվել ճնշումների. նախատեսվում է Պուտին-Ալիև հանդիպում․ այնտեղ է լինելու Իրանի նախագահը»:

Մեկնաբանելով ընդդիմության այն պնդումները, թե սահմանները բացվելով՝ Թուրքիան կկլանի Հայաստանը՝ վերջինս ասում է. «Տասնյակ հազարավոր մարդիկ այսօր ապրում են Ստամբուլում, աշխատում, ի՞նչ է նշանակում՝ սահմանը որ բացվի, Թուրքիան մեզ կկլանի: Սահմանի բացումը առաջին հերթին մեզ է ձեռնտու: Եթե վերականգնվի Գյումրի-Կարս երկաթուղին, ապա մենք անխոչընդոտ կարող ենք կապ հաստատել եվրոպական երկրների հետ: Հայաստանը որևէ աշխարհաքաղաքական վտանգ չի ներկայացնում Թուրքիայի համար, որ Թուրքիան հարձակվի մեզ վրա»:

Ինչ վերաբերում է ընդդիմության այն պնդումներին, թե պետք է վերադառնալ Նոյեմբերի 9-ի հայտարարությանը՝ Աթանեսյանը նկատում է. «Նոյեմբերի 9-ի փաստաթուղթը ասում էին՝ կապիտուլյացիա է, հիմա ասում են՝ վերադառնանք դրան: Օգոստոսի 8-ը փակել է Նոյեմբերի 9-ի էջը: Ընդդիմությունը պետք է ընդունի, թե ինչպես ողջունեց ԼՂ-ում տեղի ունեցած իշխանափոխությունը, որը առիթ դարձավ Ադրբեջանի կողմից ահաբեկչական պատերազմ սկսելուն»:

Առավել մանրամասն՝ «Հայկական ժամանակ»-ի հետ հարցազրույցում: