Բաքվում Թրամփի ուղերձը չեն հասկացե՞լ, թե իրենց «հայտնի կենդանու տեղ են դրել» 1in.am

Երրորդ օրն է, Բաքվի լրատվամիջոցների տարփողում են ԱՄՆ նախագահից Իլհամ Ալիևի «ստացած պատմական նվերի» թեման: Իրականում Դոնալդ Թրամփն հիշեցրել է օգոստոսի 8-ի վաշինգտոնյան պայմանավորվածությունները և «խրախուսել» Ալիևին. «Իլհամ, դու խիզախ առաջնորդ ես»:

Սա պարզ ակնարկ է, որ ԱՄՆ նախագահն Իլհամ Ալիևի քաղաքական վարքում «տարօրինակություններ է տեսել» և նրան պարզապես «ուշքի վերադառնալու հորդոր է անում»: Ուշագրավ է, որ Թրամփն Ալիևին «պատմական նվեր է մատուցել» ռուս-ամերիկյան հարաբերությունների «ապասառեցման» ուղղությամբ քայլերի ֆոնին և մի փուլում, երբ Իլհամ Ալիևը պատրաստվում է մեկնել Չինաստան՝ մասնակցելու ՇՀԿ գագաթաժողովին, որի «կողասրահներում», ինչպես երեւում է, նախապատրաստվում է նրա և ՌԴ նախագահ Վլադիմիր Պուտինի աշխատանքային հանդիպումը:

Ի՞նչ տեղեկության է տիրապետում Միացյալ Նահանգների նախագահը, դիվանագետները և հատուկ ծառայությունները նրան ի՞նչ կանխատեսումներ են տրամադրել, բնականաբար, հայտնի չէ: Բայց ակնհայտ է, որ Դոնալդ Թրամփը մտահոգություններ ունի և Ալիևին «խիզախ առաջնորդ» անվանելով, կարծես, հասկացրել է, որ նա կարող է ճնշումների ենթարկվել, բայց չպետք է տեղի տա՝ ունենալով ԱՄՆ աջակցությունը:

Բաքվի լրատվամիջոցները մեկօրյա ուշացումով հրապարակել են Թրամփի «նվիրատվությանն» Ալիևի սոցցանցային պատասխանը: «Երախտապարտ եմ ԱՄՆ նախագահ Դոնալդ Թրամփին՝ ինձ մատուցած պատմական լուսանկարների և դրանց վրա գրված ջերմ բառերի համար: Ես բարձր եմ գնահատում Ադրբեջանի և Հայաստանի միջև հարաբերությունների նորմալացմանը, ինչպես նաև Հարավային Կովկասում և ամբողջ աշխարհում խաղաղության օրակարգին նախագահ Դոնալդ Թրամփի վճռական աջակցությունը և ևս մեկ անգամ նրան խորին երախտագիտություն եմ հայտնում»,- գրել է Ադրբեջանի նախագահը:

Կարելի՞ է համարել, որ Ալիևը Միացյալ Նահանգների նախագահին վստահեցնում է, որ վաշինգտոնյան պայմանավորվածություններից «շեղում չի լինի»: Ալիևի պատասխան գրառումն ընդհանուր առմամբ այդ մասին է: Ուշադրության արժանի է, որ ռուս-ադրբեջանական «ապասառեցումը» բառացիորեն համընկնում է Ալյասկայում Թրամփ-Պուտին բանակցություններին, բայց ՌԴ և Իրանի նախագահների միջև նախօրեին կայացած հեռախոսազրույցում Հարավային Կովկասում «զարգացող իրադարձությունների» վրա շեշտադրումը և պայմանավորվածությունը, որ նրանք Չինաստանում կհանդիպեն, հուշում է, որ ՇՀԿ գագաթաժողովը «կարող է Ալիևին անակնկալ մատուցել»:

Այս հեռանկարը հազիվ թե Բաքվում չի կանխատեսվում, բայց պաշտոնական քարոզչությունը և փորձագիտական հանրությունը, կարծես, թեման շրջանցում է: Ավելի շատ տպավորություն է ներշնչվում, որ վաշինգտոնյան պայմանավորվածությունները «Թրամփ-Ալիև փոխըմբռնման արդյունք են»: Ներքին սպառման համար նման կեցվածքը կարելի է «նորմա» համարել, բայց «Թրամփի կամուրջ» նախագծի շուրջ խորքային քննարկումների առումով Միացյալ Նահանգների նախագահի «զգուշացումը» Բաքվում չի կարող անտեսվել: