Պուտինի շնորհավորանքը և «Կասպյան տրիոն» 1in.am

Ռուսաստանի նախագահ Վլադիմիր Պուտինը ծննդյան օրվա կապակցությամբ շնորհավորել է Մեհրիբան Ալիևային և խնդրել, որ նա Իլհամ Հեյդարովիչին ջերմ բարևներ փոխանցի: Նույն օրը հայտնի է դարձել, որ կրթության և գիտության նախարարի հրամանով նոր ուսումնական տարուց սկսված ռուսական դպրոցներում «Ադրբեջանի պատմություն» առարկան կդասավանդվի միայն ադրբեջաներեն լեզվով: Մի խումբ ծնողներ ԿԳ նախարարի այդ որոշումը բողոքարկել են, բայց դատարանը նրանց հայցը չի բավարարել:

Օգոստոսի 22 –ին Թուրքմենբաշի (նախկին Կրասնովոդսկ) քաղաքում Թուրքմենստանի փաստացի առաջնորդ Գուրբանգուլի Բերդիմուհամեդովը հյուրընկալել է Ադրբեջանի և Ուզբեկստանի նախագահներ Իլհամ Ալիևին և Շևքեթ Միրզիեևին, կայացել է եռակողմ գագաթաժողով:

Խիստ ուշագրավ է, որ Ուզբեկստանի նախագահը Վաշինգտոնում ստորագրված հայ-ադրբեջանական Հռչակագիրը համարել է տարածաշրջանում կայունության և որակապես նոր աստիճանի համագործակցության հնարավորություն։

Նախօրեին Իլհամ Ալիևը գտնվել է Քելբաջարում, որտեղ ասել է, որ հայ-ադրբեջանական նախաստորագրված Համաձայնագիրը «վերջ է տալիս Հայաստանի և Ադրբեջանի միջև դիմակայությանը»:

Ալիեւը միաժամանակ հայտարարել է, որ Ադրբեջանը «պետք է ամեն վայրկյան պատերազմի պատրաստ լինի»: Հայաստանի փորձագիտական և քաղաքական որոշակի շրջանակներ եզրակացնում են, որ Ալիևը «Հայաստանի հետ խաղաղության հասնելու մտադրություն չունի»:

Այդ մտահոգությունը հիմնազուրկ չէ, բայց պետք է նկատի ունենալ, որ Ալիևը խոսել է բոլորովին այլ պատերազմի պատրաստ լինելու մասին: Նրա խոսքում հատկապես ուշադրության արժանի է ռազմածովային ուժերի հզորացման և արդիականացման նպատակի հրապարակայնացումը: Կասպյան տարածաշրջանի էներգակիրների արդյունահանման և տարանցման, ինչպես նաև ռուս-իրանական նավագնացության շուրջ իրավիճակը լարվում է: Վերջերս Իրանը և Ռուսաստանը ռազմածովային ուժերի համատեղ զորավարժություններ են անցկացրել: Մի քանի օր անց Ադրբեջանը թուրքական արտադրության հեռակառավարվող մոտորանավակներ է փորձարկել:

Ի՞նչ հայտարարի են եկել Թուրքմենստանը, Ադրբեջանը և Ուզբեկստանը՝ մանրամասնություններ հայտնի չեն և հազիվ թե հրապարակայնացվեն: Ակնհայտ է, որ թուրքախոս երեք պետությունները ոչ միայն տնտեսական և կոմունիկացիոն, այլև անվտանգային ինտեգրացիա են ստեղծում: Անցյալ տարի Վլադիմիր Պուտինը Մեհրիբան Ալիևային անվանել է «Ադրբեջանում Ռուսաստանի ամենահավատարիմ մարդ»: Այս անգամ նա խնդրում է, որ նա իր և Ալիևի երկխոսության միջնո՞րդ լինի: Ալիև- Բերդիմուհամեդով- Միրզիեև «տրիոն» փոխում է Կասպյան ավազանի ուժերի հարաբերակցությունը: Ոչ հօգուտ Ռուսաստանի: