Գարունն էլ վերջացավ, երևի սրանք ամառային սրացումներ են․ Միքայել արքեպիսկոպոս Աջապահյանը՝ Փաշինյանի հայտարարությունների մասին armlur.am

Վաղ առավոտյան Նիկոլ Փաշինյանը, եկեղեցական համայնքին կրկին թիրախավորելով, անբարո հայտարարություն է արել՝ ասելով․ «Սրբազան, գնա շարունակիր քեռուդ կնգան դ***ել, ինձ հետ ի՞նչ գործ ունես», «Իսկ անհրաժե՞շտ է առերեսվել հարցին, թե մեր եպիսկոպոսաց դասից քանի՞ հոգի է հավատարիմ կուսակրոնության ուխտին», «ոմանց հուզել է, որ ես պաշտոնապես ամուսնացած չեմ։ Մեր հոգեւոր վերնախավի կեսը նույն վիճակում է, ու դա ոմանց չի հուզում»։

Այս հայտարարությունների վերաբերյալ ArmLur.am-ը զրուցել է Շիրակի թեմի առաջնորդ Գերաշնորհ Տեր Միքայել արքեպիսկոպոս Աջապահյանի հետ։

-Նիկոլ Փաշինյանը Կառավարության նիստում ասաց, որ «եկեղեցիները դարձրել են չուլանանոցներ», իսկ առավոտյան թիրախավորեց հոգեվորականներին՝ արտահայտվելով պաշտոնյային ոչ հարիր բառամթերքով։ Այս հայտարարությամբ չե՞ն խաթարվում եկեղեցի-պետություն հարաբերությունները։

-Է՜հ, ո՞ւր է պետություն, որ խաթարված լինի եկեղեցի-պետություն հարաբերությունները։ Դուք այստեղ պետություն տեսնո՞ւմ եք։ Եթե չասենք նույնիսկ 2018 թվականից, 2020 թվականից հետո պետություն ունե՞նք։ Սա պետությո՞ւն եք համարում։

-Եթե պետություն չունենք, եկեղեցին չպե՞տք է համախմբի ժողովրդին։

-Եկեղեցին համախմբում է, որպեսզի հայրենիքում ունենանք պետություն, որը չունենք, եկեղեցու դերը դրա մեջ է, որ այս հայրենիքը «ձեռքից չգնա», որ էս հայրենիքում ձևավորվի հայկական պետականություն, ինչը, որ չկա այսօր։

-Ըստ Ձեզ՝ այսօրվա հայտարարություններն ինչի՞ համար էին, ինչպե՞ս կմեկնաբանեք, սա ի՞նչ ուղերձ էր։

-Հիմա երևի դեղերը չի խմել կամ դեղերի վրա օղի է խմել, ինչ իմանամ, բժիշկները թող մի հատ հետազոտեն, տեսնեն սրացում է, ինչ է։ Գարունն էլ վերջացավ, երևի սրանք ամառային սրացումներ են։

-Իսկ ըստ Ձեզ՝ Մայր Աթոռը կարձագանքի՞, թե հարկ չի համարի արձագանքել։

-Դա Վեհափառ Հայրապետը կորոշի ինչպես արձագանքել։

-Ինչպե՞ս հաղթահարենք երկրում համատարած ատելության մթնոլորտն ու ստեղծված իրավիճակը։

-Այսպիսի իրավիճակների մեջ եկեղեցին 1 700 տարվա մեջ 100 անգամ առնվազն եղել է։ Սա եկեղեցու համար նորություն չի, սա հասարակության համար է նորություն, որ նորաբողբոջ մեծանում ու այսպիսի բան են տեսնում։ Եկեղեցու համար սա նորություն չի, եկեղեցու համար սա դեժավյու է։ Սա էլ կհաղթահարենք, սրան էլ կնետենք պատմության աղբանոցը, կշարունակենք մեր ընթացքը։ Ճշմարտությունը պետք է փնտրել եկեղեցում և կգտնեք։ Եկեղեցին, որպես ճշմարտության փարոս, կա, դուք պետք է այդ փարոսը տեսնեք։

Զրուցեց Էմմա Միքայելյանը